mere logo! main Khaali hath aaya hun

ka.ī manzar badalte haiñ

khulī āñkhoñ ke shīshe par sulagtī ḳhaak kā chehra

charāġhoñ kā dhuāñ,

khiḌkī,

koī rauzan...

havā ke naam karne ko hamāre paas kyā bāqī, bachā hai?

lahū ke par lagī saḌkeñ

kaTe sar par barastī jūtiyoñ ke shor meñ jaagā huā

be-ḳhānumāñ nām-o-nasab,

mātam-kunāñ girya-kunāñ āñkheñ,

shikasta-rū sahar kī siskiyāñ...

jaise

masīhāoñ ke ujle pairahan par zaḳhm bharne kī

rivāyat naqsh hotī hai

hamāre paas kyā baaqī bachā hai?

tilism-āvar shu.ūrī qahqahe

kirneñ!

dur-e-mahtāb se niklī huī kuchh mustarad kirneñ

ridā.eñ!

jin ke konoñ se bañdhe sikke

mirā tāvān Thahre haiñ

lahū tāvān meñ de kar

maiñ ḳhālī haath aayā huuñ

mire logo!

bhañvar kī raah se bach kar maiñ ḳhālī haath aayā huuñ

mujhe kis ne bulāyā thaa!

kisī ummīd se mansūb raste ne

jahāñ shāḳh-e-samar ab tak shajar kī kokh se bāhar nahīñ niklī

jahāñ

jīvan kī lambī āstīñ saañs letā hai

mirī aahoñ kā sannāTā!!

kai manzar badalte hain

khuli aankhon ke shishe par sulagti KHak ka chehra

charaghon ka dhuan,

khiDki,

koi rauzan

hawa ke nam karne ko hamare pas kya baqi, bacha hai?

lahu ke par lagi saDken

kaTe sar par barasti jutiyon ke shor mein jaga hua

be-KHanuman nam-o-nasab,

matam-kunan girya-kunan aankhen,

shikasta-ru sahar ki siskiyan

jaise

masihaon ke ujle pairahan par zaKHm bharne ki

riwayat naqsh hoti hai

hamare pas kya baqi bacha hai?

tilism-awar shuuri qahqahe

kirnen!

dur-e-mahtab se nikli hui kuchh mustarad kirnen

ridaen!

jin ke konon se bandhe sikke

mera tawan Thahre hain

lahu tawan mein de kar

main KHali hath aaya hun

mere logo!

bhanwar ki rah se bach kar main KHali hath aaya hun

mujhe kis ne bulaya tha!

kisi ummid se mansub raste ne

jahan shaKH-e-samar ab tak shajar ki kokh se bahar nahin nikli

jahan

jiwan ki lambi aastin sans leta hai

meri aahon ka sannaTa!!