shikast-e-ehsas

dost ai dost mujhe itnā batā de to sahī

aaj kī shaam ye chehre pe udāsī kaisī

kaun sī yaad chalī aa.ī tujhe bahkāne

kaun sā zaḳhm mahak uTThā hai yuuñ taḌpāne

shabnamī soch ne vo kaun sī sāzish kar dī

surma.ī fikr ne vo kaun sī karvaT badlī

maiñ ne maanā ki laboñ par vo damak hī na rahī

maiñ ne maanā ki nigāhoñ meñ chamak hī na rahī

maiñ ne maanā ki umangoñ kī haiñ āñkheñ hairāñ

maiñ ne maanā ki ḳhamoshī hai umīdoñ kī zabāñ

sach hai ye bhī ki ḳhayālāt ne dam toḌ diye

ye bhī sach hai ki tamannāoñ ne muñh pher liye

lekin itnā to batā kal bhī ye tanhā.ī thī

kal bhī ehsās pe ashkoñ kī ghaTā chhā.ī thī

kal bhī hoñToñ pe musallat thī udāsī kī lakīr

kal bhī kirnoñ ko taraste rahe ḳhvāboñ ke safīr

phir bhī ham hañste rahe hañste the hañste rahe

chand lamhoñ ke liye phir bhī chahakte hī rahe

aaj kī shaam to ai dost hai phir shām-e-ḳhushī

aaj kī shaam ye chehre pe udāsī kaisī

dost ai dost mujhe itna bata de to sahi

aaj ki sham ye chehre pe udasi kaisi

kaun si yaad chali aai tujhe bahkane

kaun sa zaKHm mahak uTTha hai yun taDpane

shabnami soch ne wo kaun si sazish kar di

surmai fikr ne wo kaun si karwaT badli

main ne mana ki labon par wo damak hi na rahi

main ne mana ki nigahon mein chamak hi na rahi

main ne mana ki umangon ki hain aankhen hairan

main ne mana ki KHamoshi hai umidon ki zaban

sach hai ye bhi ki KHayalat ne dam toD diye

ye bhi sach hai ki tamannaon ne munh pher liye

lekin itna to bata kal bhi ye tanhai thi

kal bhi ehsas pe ashkon ki ghaTa chhai thi

kal bhi honTon pe musallat thi udasi ki lakir

kal bhi kirnon ko taraste rahe KHwabon ke safir

phir bhi hum hanste rahe hanste the hanste rahe

chand lamhon ke liye phir bhi chahakte hi rahe

aaj ki sham to ai dost hai phir sham-e-KHushi

aaj ki sham ye chehre pe udasi kaisi