yaad hain

jān-e-'sahbā' sach kaho paiham sahāre yaad haiñ

vo nigāh-e-avvalīñ ke kyā sharāre yaad haiñ

yaad haiñ vo dard kī baḌhtī huī betābiyāñ

sard aaheñ ḳhushk-lab aañsū ke dhāre yaad haiñ

vo mai-e-ulfat pilā denā nigāh-e-mast se

va.ada-e-rangīñ ke vo alfāz pyāre yaad haiñ

nau-ba-nau sāz-e-mohabbat kī vo naġhma-sanjiyāñ

vo tarannum vo tabassum vo nazāre yaad haiñ

yaad haiñ vo bazm-e-ishrat kī sukūñ-sāmāniyāñ

shab kī ḳhāmoshī vo dariyā ke kināre yaad haiñ

vo fazā-e-rūh-parvar vo bahār-e-jāñ-fazā

vasl kī shab ke tumheñ vo chāñd taare yaad haiñ

merī jānib vo bharī mahfil meñ ḳhāmoshī ke saath

apnī chashm-e-mast ke rangīñ ishāre yaad haiñ

phir zarā dhīme suroñ meñ gungunānā sher kā

phuul se jhaḌte hue gardūñ ke taare yaad haiñ

aadhī aadhī raat tak shām-e-mohabbat kī bahār

sub.h kī tanvīr meñ jalve tumhāre yaad haiñ

yaad haiñ 'sahbā' shabāb-o-sher kī rangīniyāñ

haañ hadīs-e-ishq ke alfāz saare yaad haiñ

aaj bhī maiñ sun rahā huuñ naġhma-hā-e-jāñ-fazā

dauḌtī hai sāz-e-hastī meñ tirī rangīñ navā

jaan-e-'sahba' sach kaho paiham sahaare yaad hain

wo nigah-e-awwalin ke kya sharare yaad hain

yaad hain wo dard ki baDhti hui betabiyan

sard aahen KHushk-lab aansu ke dhaare yaad hain

wo mai-e-ulfat pila dena nigah-e-mast se

wada-e-rangin ke wo alfaz pyare yaad hain

nau-ba-nau saz-e-mohabbat ki wo naghma-sanjiyan

wo tarannum wo tabassum wo nazare yaad hain

yaad hain wo bazm-e-ishrat ki sukun-samaniyan

shab ki KHamoshi wo dariya ke kinare yaad hain

wo faza-e-ruh-parwar wo bahaar-e-jaan-faza

wasl ki shab ke tumhein wo chand tare yaad hain

meri jaanib wo bhari mahfil mein KHamoshi ke sath

apni chashm-e-mast ke rangin ishaare yaad hain

phir zara dhime suron mein gungunana sher ka

phul se jhaDte hue gardun ke tare yaad hain

aadhi aadhi raat tak sham-e-mohabbat ki bahaar

subh ki tanwir mein jalwe tumhaare yaad hain

yaad hain 'sahba' shabab-o-sher ki ranginiyan

han hadis-e-ishq ke alfaz sare yaad hain

aaj bhi main sun raha hun naghma-ha-e-jaan-faza

dauDti hai saz-e-hasti mein teri rangin nawa