بڑے سکون سے افسردگی میں رہتا ہوں

میں اپنے سامنے والی گلی میں رہتا ہوں

ہزار طعنے سنے گا خجل نہیں ہوگا

یہ وہ ہجوم ہے جو مشتعل نہیں ہوگا

فلک سے کیسے مرا غم دکھائی دے گا تجھے

کبھی زمین پہ آ اور زمیں سے دیکھ مجھے

زخم اور پیڑ نے اک ساتھ دعا مانگی ہے

دیکھیے پہلے یہاں کون ہرا ہوتا ہے

پوچھتا پھرتا ہوں میں اپنا پتہ جنگل سے

آخری بار درختوں نے مجھے دیکھا تھا

میاں یہ عشق تو سب ٹوٹ کر ہی کرتے ہیں

کسی سے ہجر اگر والہانہ ہو جائے

یہ محبت کوئی انجان سی شے ہوتی تھی

کیا یہ کم ہے کہ اسے تیری بدولت سمجھے

سب مجھے ڈھونڈنے نکلے ہیں بجھا کر آنکھیں

بات نکلی ہے کہ میں خواب میں پایا گیا ہوں

نکال لائے ہیں سب لوگ اس کے عکس میں نقص

یہ آئینہ ابھی تیار ہونے والا ہے

ابھی سے اس میں شباہت مری جھلکنے لگی

ابھی تو دشت میں دو چار دن گزارے ہیں