اگر تیری طرح تبلیغ کرتا پیر مے خانہ

تو دنیا بھر میں واعظ مے کشی ہی مے کشی ہوتی

سرد مہری سے تری گرمئ الفت نہ رہی

دل میں اٹھتا تھا جو ہر دم وہ شرارہ بھی گیا

رہ وفا میں انہیں کی خوشی کی بات کرو

وہ زندگی ہیں تو پھر زندگی کی بات کرو

ہنسا کرتے ہیں اکثر لوگ دیوانوں کی باتوں پر

جہاں والے نہیں سمجھے محبت کی زباں شاید

مجھے وہ باتوں باتوں میں اگر دیوانہ کہہ دیتے

تو دیوانوں میں میری معتبر دیوانگی ہوتی

مزاج حسن تو اک حال پر رہا قائم

لٹانے والوں نے سب کچھ لٹا کے دیکھ لیا

ترے خیال میں میں ہوں مرے خیال میں تو

مرے بغیر تری داستاں رہے نہ رہے

وفاداری غرور بے رخی کو ختم کر دے گی

زیادہ تو نہیں کچھ دن رہیں وہ بد گماں شاید

مسرور ہو رہے ہیں غم عاشقی سے ہم

کیوں تنگ ہوں گے کشمکش زندگی سے ہم

کارواں عشق کی منزل کے قریں آ پہونچا

خود مرے دل میں مرے دل کا مکیں آ پہونچا

ایک ہی چیز ہے پردے میں کہ بیرون حجاب

مجھ کو ظاہر بھی کیا خود کو چھپایا بھی گیا

ہوش میں لانے کی تدبیر نہ کر اے ناصح

میں نے پایا ہے انہیں چاک گریباں ہو کر

راہ وفا میں جی کے مرے مر کے بھی جئے

کھیلا اسی طرح سے کئے زندگی سے ہم

دل کے آئینے میں جب آپ کی صورت دیکھی

جس کو دھوکا میں سمجھتا تھا وہ دھوکا بھی گیا

ہماری لاش گلستاں میں دفن کر صیاد

چمن سے دور کوئی نوحہ خواں رہے نہ رہے

نگاہ پردہ کشا کا کمال کیا کہنا

جہاں جہاں وہ چھپے اس نے جا کے دیکھ لیا

ظلمتوں کا گزر کہاں ممکن

ان کا روشن خیال آتا ہے