جس کی ادا ادا پہ ہو انسانیت کو ناز

مل جائے کاش ایسا بشر ڈھونڈتے ہیں ہم

جمہوریت کا درس اگر چاہتے ہیں آپ

کوئی بھی سایہ دار شجر دیکھ لیجئے

میں جن کو اپنا کہتا ہوں کب وہ مرے کام آتے ہیں

یہ سارا سنسار ہے سپنا سب جھوٹے رشتے ناطے ہیں

ستم یہ ہے وہ کبھی بھول کر نہیں آیا

تمام عمر رہا جس کا انتظار مجھے

ہو بجلیوں کا مجھ سے جہاں پر مقابلہ

یارب وہیں چمن میں مجھے آشیانہ دے

محو حیرت ہوں خراش دست غم کو دیکھ کر

زخم چہرے پر ہیں یا ہے آئینہ ٹوٹا ہوا

ایک ہم ہیں ہم نے کشتی ڈال دی گرداب میں

ایک تم ہو ڈرتے ہو آتے ہوئے ساحل کے پاس

منتظر ہوں میں کفن باندھ کے سر سے عاجزؔ

سامنے سے کوئی خنجر نہیں آیا اب تک

انسان حادثات سے کتنا قریب ہے

تو بھی ذرا نکل کے کبھی اپنے گھر سے دیکھ

حسرتیں آ آ کے جمع ہو رہی ہیں دل کے پاس

کارواں گویا پہنچنے والا ہے منزل کے پاس

آغاز محبت میں عاجزؔ رکتی نہ تھی موج اشک رواں

انجام اب ان خشک آنکھوں سے اک اشک نکلنا مشکل ہے

ہوتا ہے محسوس یہ عاجزؔ شاید اس نے دستک دی

تیز ہوا کے جھونکے جب دروازے سے ٹکراتے ہیں