jis kī adā adā pe ho insāniyat ko naaz

mil jaa.e kaash aisā bashar DhūñDte haiñ ham

jis ki ada ada pe ho insaniyat ko naz

mil jae kash aisa bashar DhunDte hain hum

jamhūriyat kā dars agar chāhte haiñ aap

koī bhī sāya-dār shajar dekh lījiye

jamhuriyat ka dars agar chahte hain aap

koi bhi saya-dar shajar dekh lijiye

sitam ye hai vo kabhī bhuul kar nahīñ aayā

tamām umr rahā jis kā intizār mujhe

sitam ye hai wo kabhi bhul kar nahin aaya

tamam umr raha jis ka intizar mujhe

maiñ jin ko apnā kahtā huuñ kab vo mire kaam aate haiñ

ye saarā sansār hai sapnā sab jhūTe rishte-nāte haiñ

main jin ko apna kahta hun kab wo mere kaam aate hain

ye sara sansar hai sapna sab jhuTe rishte-nate hain

ek ham haiñ ham ne kashtī Daal dī gardāb meñ

ek tum ho Darte ho aate hue sāhil ke paas

ek hum hain hum ne kashti Dal di gardab mein

ek tum ho Darte ho aate hue sahil ke pas

insān hādsāt se kitnā qarīb hai

tū bhī zarā nikal ke kabhī apne ghar se dekh

insan hadsat se kitna qarib hai

tu bhi zara nikal ke kabhi apne ghar se dekh

muntazir huuñ maiñ kafan bāñdh ke sar se 'ājiz'

sāmne se koī ḳhanjar nahīñ aayā ab tak

muntazir hun main kafan bandh ke sar se 'ajiz'

samne se koi KHanjar nahin aaya ab tak

ho bijliyoñ kā mujh se jahāñ par muqābla

yā-rab vahīñ chaman meñ mujhe āshiyāna de

ho bijliyon ka mujh se jahan par muqabla

ya-rab wahin chaman mein mujhe aashiyana de

hasrateñ aa aa ke jam.a ho rahī haiñ dil ke paas

kārvāñ goyā pahuñchne vaalā hai manzil ke paas

hasraten aa aa ke jama ho rahi hain dil ke pas

karwan goya pahunchne wala hai manzil ke pas

hotā hai mahsūs ye 'ājiz' shāyad us ne dastak dī

tez havā ke jhoñke jab darvāze se Takrāte haiñ

hota hai mahsus ye 'ajiz' shayad us ne dastak di

tez hawa ke jhonke jab darwaze se Takraate hain

mahv-e-hairat huuñ ḳharāsh-e-dast-e-ġham ko dekh kar

zaḳhm chehre par haiñ yā hai ā.īna TuuTā huā

mahw-e-hairat hun KHarash-e-dast-e-gham ko dekh kar

zaKHm chehre par hain ya hai aaina TuTa hua

āġhāz-e-mohabbat meñ 'ājiz' ruktī na thī mauj-e-ashk-e-ravāñ

anjām ab in ḳhushk āñkhoñ se ik ashk nikalnā mushkil hai

aaghaz-e-mohabbat mein 'ajiz' rukti na thi mauj-e-ashk-e-rawan

anjam ab in KHushk aankhon se ek ashk nikalna mushkil hai