یہ کیسی جگہ ہے کہ دل کھو رہا ہے

بیاباں ہے صحرا ہے گلشن ہے کیا ہے

ستاروں کی گردش دلوں کا بچھڑنا

یہ کیسے خدا کی ہے کیسی خدائی

وہ جادو ادائیں اداؤں میں جادو

یہ پہنچایں ہم کو فنا سے بقا تک

راہ حیات میں نہ ملی ایک پل خوشی

غم کا یہ بوجھ دوش پہ سامان سا رہا

ترے فراق میں ہم نے بہائے اشک جگر

یہ سب نے چاہا مگر آئے تو لہو آئے

غم وجود کا ماتم کروں تو کیسے جیوں

مگر خدا ترے دامن پہ داغ ہے کہ نہیں

رسم دنیا کے سلاسل میں گرفتاری ہے

مت ٹھہرنا کہ کہیں پھانس جواں تر ہو جائے

آستانوں کی قدم بوسی میں پنہاں خون سر

اور وفور شوق میں یہ سر ہو خم کچھ اور ہے

ذات خاکی کی تہوں میں خفتہ ہیں انواع خاک

رنگہائے تہ بہ تہ کا پیچ و خم کچھ اور ہے

لٹا یہ کارواں کب کا نہ جانے کون تھی منزل

مگر احباب اب بھی زعم چغتائی میں جیتے ہیں

دلوں میں نور ہے ترسیل گوش کر بھی ہو

پیام جاتے نہیں طرز لن ترانی میں

کوئی جلتا ہے تماشا بن کے اس کی بزم میں

میں غریب شہر تھا پنہاں کا پنہاں جل گیا

اے جمال بے بدل لیکن ادا میں بے رخی

ہو گئیں صدیاں کہ چشم تشنہ تیری منتظر

تیرا جلوہ ہے آج توبہ شکن

آؤ شوق حجاب رہنے دو

پنہاں ہیں صد سوال پس پردۂ حیا

دل دے دیا جواب تھا لیکن رہے خموش

رستم ہے گر جو عشق میں بن کر و فر کے آ

تہمینۂ بتاں کے یہاں بے سپر کے آ

ہے کاروان قدسیٔ حرف ازل رواں

ہر جہل و ظلم و ظلمت و زیر و زبر کے ساتھ

وحشت دنیا گزیدہ اب ہیں ذات و کائنات

شرح نالہ گریۂ احساس و جاں کیسے کروں

سکوں کہیں بھی نہیں بزم کامرانی میں

مسافتیں نہیں طے ہوتیں لا مکانی میں

زعم تقا حجاب تظاہر نفاق کا

ہر جا رقم ہے اس میں بھی اذن و قم دروغ

مفقود ہے فراست وجداں سگاں میں ہوں

اک حسرت مروت کج دیدگاں میں ہوں

اک موج غم گزیدگی سے ہیں نڈھال سب

آئینۂ درست میں سب ہی سراب پوش

ساری دنیا جیسے نامردی کو اوڑھے ہر طرف

بس تماشائی کھڑی ہے چشم حیرانی کے ساتھ

اگر ضمیر ہے تابوت بے حسی میں بند

یزید شہر سے بیعت میں پھر قباحت کیا