ہنسی مذاق کی باتیں یہیں پہ ختم ہوئیں

اب اس کے بعد کہانی رلانے والی ہے

تو کہانی کے بدلتے ہوئے منظر کو سمجھ

خون روتے ہوئے کردار کی جانب مت دیکھ

جو رکاوٹ تھی ہماری راہ کی

راستہ نکلا اسی دیوار سے

اکیلا میں ہی نہیں جا رہا ہوں بستی سے

یہ روشنی بھی مرے ساتھ جانے والی ہے

اپنے ویرانے کا نقصان نہیں چاہتا میں

یعنی اب دوسرا انسان نہیں چاہتا میں

یوں تو ہر ایک شخص کا اپنا ہی شور ہے

لیکن کسی سے کوئی یہاں بولتا نہیں

مجھے بیان کر رہا تھا کوئی شخص

میں اپنی داستان ڈھونڈھتا رہا

ہاتھ پتھر سے ہو گئے مانوس

شوق کوزہ گری کا کیا کیجے

سنا رہا ہے کہانی ہمیں مکینوں کی

مکاں کے ساتھ یہ آدھا جلا ہوا بستر

آنسوؤں کی طرح وجود مرا

بہتا جاتا ہے آبشار کے ساتھ