وہ ساڑی جیولری کے تحائف پہ تھی بضد

ہم سو روپے کی شال سے آگے نہیں گئے

ہے کامیابیٔ مرداں میں ہاتھ عورت کا

مگر تو ایک ہی عورت پہ انحصار نہ کر

میں ایک بوری میں لایا ہوں بھر کے مونگ پھلی

کسی کے ساتھ دسمبر کی رات کاٹنی ہے

وہ افطاری سے پہلے چکھتے چکھتے

کهجوریں اور پکوڑے کھا چکا ہے

وہ تیس سال سے ہے فقط بیس سال کی

چہرے پہ آ چکی ہے بزرگی جمال کی

عشق میں یہ تفرقہ بازی بہت معیوب ہے

پیار کو شیعہ وہابی اور سنی مت سمجھ

دے رہے ہیں اس لیے جنگل میں دھرنا جانور

ایک چوہے کو رہائش کے لیے بل چاہیئے

کتنی مزاحیہ ہے یہ بوتل کے جن کی بات

آقا اب انقلاب ہے دو چار دن کی بات

مورخ لکھ نہ دیں سقراط مجھ کو

میں لسی کا پیالہ پی رہا ہوں

ایسی خواہش کو سمجھتا ہوں میں بالکل نیچرل

ڈاکٹر کو شہر کا ہر مرد و زن ال چاہئے

دو خط بنام زوجہ و جاناں لکھے مگر

دونوں خطوں کا اس سے لفافہ بدل گیا

کودے ہیں اس کے صحن میں دو چار شیر دل

ہم فیس بک کی وال سے آگے نہیں گئے

نہ یہ قانون کام آیا تھا رانجھے کے ذرا سا بھی

اسی کو بھینس ملتی ہے ہو جس کے ہاتھ میں لاٹھی

کیبل پہ ایک شیف سے جلدی میں سیکھ کر

لائی وہ شملہ مرچ کا حلوہ مرے لیے

وے بالوں میں کلر لگوا چکا ہے

یہ دھوکہ پانچ سو میں کھا چکا ہے

تھکا ہارا نکل کر گھر سے اپنے

وہ پھر آفس میں سونے جا چکا ہے

یہ دیا میسج ٹوئیٹر پر فسادی شخص نے

اس کو جلتی کے لیے فی الفور آئل چاہیئے

بیگم سے کہہ رہا تھا یہ کوئی خلا نورد

بیٹھی ہوئی ہے چاند پہ ''گڑیا'' مرے لیے

ایسے بندوں کو جانتا ہوں میں

جن کا واحد علاج مالش ہے

دس بارہ غزلیات جو رکھتا ہے جیب میں

بزم سخن میں ہے وہ نشانی وبال کی