azaab hotī haiñ aksar shabāb kī ghaḌiyāñ

gulāb apnī hī ḳhushbū se Darne lagte haiñ

azab hoti hain aksar shabab ki ghaDiyan

gulab apni hi KHushbu se Darne lagte hain

har shaḳhs ko gumān ki manzil nahīñ hai duur

ye to batā.iye ki pata kis ke paas hai

har shaKHs ko guman ki manzil nahin hai dur

ye to bataiye ki pata kis ke pas hai

qātil kī saarī sāzisheñ nākām hī rahīñ

chehra kuchh aur khil uThā zahrāb gar piyā

qatil ki sari sazishen nakaam hi rahin

chehra kuchh aur khil uTha zahrab gar piya

āj-kal to sab ke sab T.v ke dīvāne hue

varna bachche to liyā karte the pāgal ke maze

aaj-kal to sab ke sab Tw ke diwane hue

warna bachche to liya karte the pagal ke maze

phaldār daraḳhtoñ ne rijhāyā to mujhe bhī

āzād parindoñ ke liye shāḳh-o-samar kyā

phaldar daraKHton ne rijhaya to mujhe bhi

aazad parindon ke liye shaKH-o-samar kya

lahū kā āḳhirī qatra nichoḌne par bhī

taqāze reñgte rahte haiñ rañg-o-bū ke liye

lahu ka aaKHiri qatra nichoDne par bhi

taqaze rengte rahte hain rang-o-bu ke liye