maiñ chāhūñ bhī to zamāna badal nahīñ saktī

ki 'bushrā' log yahāñ jhuuT bolte haiñ bahut

main chahun bhi to zamana badal nahin sakti

ki 'bushra' log yahan jhuT bolte hain bahut

ham manziloñ ke baasī kab se bhaTak rahe haiñ

kab raah par chalegā ye rāsta hamārā

hum manzilon ke basi kab se bhaTak rahe hain

kab rah par chalega ye rasta hamara

jis ruup meñ bhī chāho ham aa mileñge tum ko

nuur aur ḳhaak tak hai sab silsila hamārā

jis rup mein bhi chaho hum aa milenge tum ko

nur aur KHak tak hai sab silsila hamara

use kaho ki use baḳhsh dūñgī saarā jahāñ

use kaho ki mirī samt ek baar aa.e

use kaho ki use baKHsh dungi sara jahan

use kaho ki meri samt ek bar aae

hameñ to saañs bhī lene kī fursateñ na rahīñ

kisī kī yaad ke muñh-zor silsile haiñ bahut

hamein to sans bhi lene ki fursaten na rahin

kisi ki yaad ke munh-zor silsile hain bahut

dair-o-haram pukārne aa.e hameñ magar

lekin ḳhayāl-e-yār se fursat nahīñ milī

dair-o-haram pukarne aae hamein magar

lekin KHayal-e-yar se fursat nahin mili

jab apnī āñkhoñ se chehre ka.ī utaar aa.e

qadam qadam pe ka.ī baar phir ġhubār aa.e

jab apni aankhon se chehre kai utar aae

qadam qadam pe kai bar phir ghubar aae

zulmat ke kārobār se fursat nahīñ milī

jis ko tire dayār se fursat nahīñ milī

zulmat ke karobar se fursat nahin mili

jis ko tere dayar se fursat nahin mili