apnī tārīf sun ke ḳhush mat ho

varna dil meñ ġhurūr paltā hai

apni tarif sun ke KHush mat ho

warna dil mein ghurur palta hai

aql yūñhī kise milī hai dost

tajraba āgahī meñ Dhaltā hai

aql yunhi kise mili hai dost

tajraba aagahi mein Dhalta hai

tum jahāñ ho vahāñ ye yaad rakho

har sitāra jagah badaltā hai

tum jahan ho wahan ye yaad rakho

har sitara jagah badalta hai

zahr jab aadmī ugaltā hai

tab muqābil kahāñ sañbhaltā hai

zahr jab aadmi ugalta hai

tab muqabil kahan sanbhalta hai

itnī jhelī hai dil ne māyūsī

lā-shu.ūrī meñ haath maltā hai

itni jheli hai dil ne mayusi

la-shuuri mein hath malta hai

aa.ine se banā.e rakh har dam

aa.ina shaḳhsiyat badaltā hai

aaine se banae rakh har dam

aaina shaKHsiyat badalta hai

kyā zarūrī hai saath deñ sāthī

yuuñ to saaya bhī saath chaltā hai

kya zaruri hai sath den sathi

yun to saya bhi sath chalta hai

sham.a kā jism roz jaltā hai

tabsira raushnī pe chaltā hai

shama ka jism roz jalta hai

tabsira raushni pe chalta hai

ashk jo aañkh se nikaltā hai

hiddat-e-ġham se dil pighaltā hai

ashk jo aankh se nikalta hai

hiddat-e-gham se dil pighalta hai