huī thī ik ḳhatā sarzad so us ko muddateñ guzrīñ

magar ab tak mire dil se pashemānī nahīñ jaatī

hui thi ek KHata sarzad so us ko muddaten guzrin

magar ab tak mere dil se pashemani nahin jati

hai ye taqdīr kī ḳhūbī ki nigāh-e-mushtāq

pardā ban jaa.e agar parda-nashīñ tak pahuñche

hai ye taqdir ki KHubi ki nigah-e-mushtaq

parda ban jae agar parda-nashin tak pahunche

ulfat kī thiiñ dalīl tirī bad-gumāniyāñ

ab bad-gumān maiñ huuñ ki tū bad-gumāñ nahīñ

ulfat ki thin dalil teri bad-gumaniyan

ab bad-guman main hun ki tu bad-guman nahin

hujūm-e-rañj-o-ġham ne is qadar mujh ko rulāyā hai

ki ab rāhat kī sūrat mujh se pahchānī nahīñ jaatī

hujum-e-ranj-o-gham ne is qadar mujh ko rulaya hai

ki ab rahat ki surat mujh se pahchani nahin jati

rañj o alam kā lutf uThāne ke vāste

rāhat se bhī nibāh kiye jā rahā huuñ maiñ

ranj o alam ka lutf uThane ke waste

rahat se bhi nibah kiye ja raha hun main