pā ke ik terā tabassum muskurā.ī kā.enāt

jhuum uTThā vo bhī dil jiine se jo bezār thā

pa ke ek tera tabassum muskurai kaenat

jhum uTTha wo bhi dil jine se jo bezar tha

nik.hat vahī surūr vahī dil-kashī vahī

aamad ye aap kī hai ki jhoñkā bahār kā

nikhat wahi surur wahi dil-kashi wahi

aamad ye aap ki hai ki jhonka bahaar ka

yā guftugū ho un lab-o-ruḳhsār-o-zulf kī

yā un ḳhamosh nazroñ ke lutf-e-suḳhan kī baat

ya guftugu ho un lab-o-ruKHsar-o-zulf ki

ya un KHamosh nazron ke lutf-e-suKHan ki baat

is sīna-e-vīrāñ meñ khilā.e na kabhī phuul

kyoñ baaġh pe itrātī rahī bād-e-sabā hai

is sina-e-viran mein khilae na kabhi phul

kyon bagh pe itraati rahi baad-e-saba hai

insāñ ke dil kī ḳhair zamīñ āsmāñ kī ḳhair

har roz gul khilāte haiñ insāñ na.e na.e

insan ke dil ki KHair zamin aasman ki KHair

har roz gul khilate hain insan nae nae

har ik qadam pe zindagī hai intizār meñ

kitne hī moḌ ubhreñge har ik safar ke saath

har ek qadam pe zindagi hai intizar mein

kitne hi moD ubhrenge har ek safar ke sath

is qadar va.ade kā andāz hasīñ hotā hai

ki tire jhuuT pe bhī sach kā yaqīñ hotā hai

is qadar wade ka andaz hasin hota hai

ki tere jhuT pe bhi sach ka yaqin hota hai

junūñ hī saath rahe zindagī meñ mere 'habīb'

safar meñ aur koī ham-safar mile na mile

junun hi sath rahe zindagi mein mere 'habib'

safar mein aur koi ham-safar mile na mile

dil TuuT ke hī āḳhir bantā hai kisī qābil

taḳhrīb ke parde meñ ta.amīr nazar aa.ī

dil TuT ke hi aaKHir banta hai kisi qabil

taKHrib ke parde mein tamir nazar aai

terī yādoñ kā hī sarmāyā liye baiThe haiñ

ham kabhī be-sar-o-sāmān na hone paa.e

teri yaadon ka hi sarmaya liye baiThe hain

hum kabhi be-sar-o-saman na hone pae

TuuT jaate haiñ jo duniyā ke sahāre saare

parda-e-ġhaib se hotā hai sahārā paidā

TuT jate hain jo duniya ke sahaare sare

parda-e-ghaib se hota hai sahaara paida

bichhḌe mujh se is tarah vo zindagī ke ham-safar

bujh ga.e hoñ jalte jalte jaise raste ke charāġh

bichhDe mujh se is tarah wo zindagi ke ham-safar

bujh gae hon jalte jalte jaise raste ke charagh

na tamannā hai tirī aur na vo dard tapish

dil ke marne kā mujhe ab to yaqīñ hotā hai

na tamanna hai teri aur na wo dard tapish

dil ke marne ka mujhe ab to yaqin hota hai

umr apnī to isī taur se guzrī hai 'habīb'

rahā tūfāñ hī nigāhoñ meñ kināra na rahā

umr apni to isi taur se guzri hai 'habib'

raha tufan hi nigahon mein kinara na raha

havas ne husn kī aisī bigāḌ dī sūrat

'habīb' kaun hai jo us ko aaj pahchāne

hawas ne husn ki aisi bigaD di surat

'habib' kaun hai jo us ko aaj pahchane

jigar ke daaġh dikhāne se fā.eda kyā hai

abhī zamāne ke hālāt sāzgār nahīñ

jigar ke dagh dikhane se faeda kya hai

abhi zamane ke haalat sazgar nahin

ḳhayāl-e-yār ke raushan diye karo varna

añdherī raat meñ manzil kā e'tibār nahīñ

KHayal-e-yar ke raushan diye karo warna

andheri raat mein manzil ka e'tibar nahin

hāl-e-dil kahte hī aa jaatī hai jab yaad un kī

ham kahīñ hote haiñ afsāna kahīñ hotā hai

haal-e-dil kahte hi aa jati hai jab yaad un ki

hum kahin hote hain afsana kahin hota hai

haiñ sab ye tire shikve kotāhī-e-ulfat se

kuchh dil kī taḌap kam hai kuchh ḳhaam tamannā hai

hain sab ye tere shikwe kotahi-e-ulfat se

kuchh dil ki taDap kam hai kuchh KHam tamanna hai

un ke hoñToñ par aayā tabassum udhar

nabz-e-ālam idhar tez-tar ho ga.ī

un ke honTon par aaya tabassum udhar

nabz-e-alam idhar tez-tar ho gai

sah lūñgā ai 'habīb' sitam-hā-e-rozgār

hāsil agar ho dost kī pyārī nazar mujhe

sah lunga ai 'habib' sitam-ha-e-rozgar

hasil agar ho dost ki pyari nazar mujhe

mujhe hī dekh ki jiitā huuñ tere va.adoñ par

ye kaun kahtā hai va.adoñ pe e'tibār nahīñ

mujhe hi dekh ki jita hun tere wadon par

ye kaun kahta hai wadon pe e'tibar nahin

hāl-e-dil par hañsā kabhī royā

yuuñ mirī umr be-sabāt ga.ī

haal-e-dil par hansa kabhi roya

yun meri umr be-sabaat gai

jis pe ik baar jale haiñ tire qadmoñ ke charāġh

rāste vo kabhī sunsān na hone paa.e

jis pe ek bar jale hain tere qadmon ke charagh

raste wo kabhi sunsan na hone pae

donoñ hāthoñ se masarrat ko luTāyā hai 'habīb'

ġham kī daulat to magar tum se luTā.ī na ga.ī

donon hathon se masarrat ko luTaya hai 'habib'

gham ki daulat to magar tum se luTai na gai

apnā ye charāġh-e-dil maddham hī sahī lekin

duniyā ke añdheroñ se tanhā hī ye laḌtā hai

apna ye charagh-e-dil maddham hi sahi lekin

duniya ke andheron se tanha hi ye laDta hai

aql-e-insāñ ne biThā rakkhe haiñ pahre dil par

dil kī kyā baat kahegā jo na dīvāna bane

aql-e-insan ne biTha rakkhe hain pahre dil par

dil ki kya baat kahega jo na diwana bane

bhes meñ masarrat ke ġham kahīñ na aayā ho

is sabab se Dar Dar kar ham ḳhushī se milte haiñ

bhes mein masarrat ke gham kahin na aaya ho

is sabab se Dar Dar kar hum KHushi se milte hain

un se hañste hī hañste mohabbat sī shai

hone vaalī kahīñ thī magar ho ga.ī

un se hanste hi hanste mohabbat si shai

hone wali kahin thi magar ho gai

is ālam-e-fānī meñ sadā kaun rahā hai

ik naam hai allāh kā ik naqsh-e-vafā hai

is aalam-e-fani mein sada kaun raha hai

ek nam hai allah ka ek naqsh-e-wafa hai

chhoḌ aate haiñ har jānib kuchh naqsh-e-vafā apne

ham ziist kī rāhoñ se jis vaqt guzarte haiñ

chhoD aate hain har jaanib kuchh naqsh-e-wafa apne

hum zist ki rahon se jis waqt guzarte hain

mānūs is qadar huuñ maiñ lazzat se dard kī

dil hai ki DhūñD letā hai paikāñ na.e na.e

manus is qadar hun main lazzat se dard ki

dil hai ki DhunD leta hai paikan nae nae

andāz muqaddar ke haiñ gesū-e-jānāñ se

jo gaah ulajhte haiñ aur gaah sañvarte haiñ

andaz muqaddar ke hain gesu-e-jaanan se

jo gah ulajhte hain aur gah sanwarte hain

'habīb' ḳhud hī banā.eñge roz-o-shab apne

huā hī kyā jo zamāne ne saath chhoḌ diyā

'habib' KHud hi banaenge roz-o-shab apne

hua hi kya jo zamane ne sath chhoD diya

is tarah be-kaif guzrā ai 'habīb' apnā shabāb

jis tarah se suune ghar meñ jaltā hai koī charāġh

is tarah be-kaif guzra ai 'habib' apna shabab

jis tarah se sune ghar mein jalta hai koi charagh

is darja kabhī jāzib ye duniyā na thī pahle

ye kis ke tasavvur meñ tasvīr nazar aa.ī

is darja kabhi jazib ye duniya na thi pahle

ye kis ke tasawwur mein taswir nazar aai

jab thake hāthoñ se patvār bhī gir jaate haiñ

ain girdāb meñ hotā hai kināra paidā

jab thake hathon se patwar bhi gir jate hain

ain girdab mein hota hai kinara paida

jahāñ kahīñ bhī koī dil-figār hotā hai

vahīñ pe sāya-e-parvardigār hotā hai

jahan kahin bhi koi dil-figar hota hai

wahin pe saya-e-parwardigar hota hai

vo naala jo siine se na aayā kabhī lab tak

hañgāmoñ meñ duniyā ke use tū ne sunā hai

wo nala jo sine se na aaya kabhi lab tak

hangamon mein duniya ke use tu ne suna hai

insāñ ke dard-o-ġham kā kahīñ zikr hī nahīñ

hai baat shaiḳh kī to kabhī barhaman kī baat

insan ke dard-o-gham ka kahin zikr hi nahin

hai baat shaiKH ki to kabhi barhaman ki baat

nālāñ huuñ apne zauq-e-nazar se 'habīb' kyoñ

kyā sah rahe haiñ qalb-o-jigar kuchh na pūchhiye

nalan hun apne zauq-e-nazar se 'habib' kyon

kya sah rahe hain qalb-o-jigar kuchh na puchhiye

jahāñ hasīñ hai mohabbat kī dil-navāzī se

magar ye raaz koī ḳhāl-ḳhāl hī jaane

jahan hasin hai mohabbat ki dil-nawazi se

magar ye raaz koi KHal-KHal hi jaane

kisī ke javoñ se ma.amūr hai jahāñ apnā

nahīñ ye fikr ki duniyā ne saath chhoḌ diyā

kisi ke jawon se mamur hai jahan apna

nahin ye fikr ki duniya ne sath chhoD diya

yād-e-hazīñ nuqūsh-e-karam aur nigāh-e-chand

kyā bāñdhā ham ne raḳht-e-safar kuchh na pūchhiye

yaad-e-hazin nuqush-e-karam aur nigah-e-chand

kya bandha hum ne raKHt-e-safar kuchh na puchhiye

bedād-e-muqaddar se dil merā ulajhtā hai

jab aap nazar mujh par kuchh lutf se karte haiñ

bedad-e-muqaddar se dil mera ulajhta hai

jab aap nazar mujh par kuchh lutf se karte hain

gul hī kabhī to muntaḳhab-e-rozgār thā

ḳhāroñ pe ab to aayā hai mausam bahār kā

gul hi kabhi to muntaKHab-e-rozgar tha

KHaron pe ab to aaya hai mausam bahaar ka

maqtal to hoñge aaj bhī mansūr haiñ kahāñ

ab zeb-e-dāstān hai dār-o-rasan kahāñ

maqtal to honge aaj bhi mansur hain kahan

ab zeb-e-dastan hai dar-o-rasan kahan

har ik fasurda qalb pe chhā.ī shaguftagī

jab chhiḌ ga.ī hai bazm meñ us gul-badan kī baat

har ek fasurda qalb pe chhai shaguftagi

jab chhiD gai hai bazm mein us gul-badan ki baat

dil-kashī tere tasavvur kī rahī roz-afzūñ

bāhamī rabt kā har chand vo naqsha na rahā

dil-kashi tere tasawwur ki rahi roz-afzun

bahami rabt ka har chand wo naqsha na raha

shab-e-ġham kā 'habīb' shikva kyoñ

dekh vo pau phaTī vo raat aa.ī

shab-e-gham ka 'habib' shikwa kyon

dekh wo pau phaTi wo raat aai