کہیں ایسا نہ ہو مر جاؤں میں حسرت ہی حسرت میں

جو لینا ہو تو لے لو سب سے پہلے امتحاں میرا

شب وصل کیا جانے کیا یاد آیا

وہ کچھ آپ ہی آپ شرما رہے ہیں

تم پاس جو آئے کھو گئے ہم

جب تم نہ ملے تو جستجو کی

تمہیں ہے نشہ جوانی کا ہم میں غفلت عشق

نہ اختیار میں تم ہو نہ اختیار میں ہم

یہ اک بوسے پہ اتنی بحث یہ زیبا نہیں تم کو

نہیں ہے یاد مجھ کو خیر اچھا لے لیا ہوگا

صورت نہ یوں دکھائے انہیں بار بار چاند

پیدا کرے حسینوں میں کچھ اعتبار چاند

سب خط تمام کر چکے پڑھ پڑھ کے شوق سے

واں تھم گئے جہاں پہ مرا نام آ گیا

امید کا برا ہو سمجھا کہ آپ آئے

بے وجہ شب کو ہل کر زنجیر در نے مارا

تم دیئے جاؤ یوں ہی ہم کو ہوا دامن کی

ہم سے بے ہوش نہیں ہوش میں آنے والے

خاک اڑ کے ہماری ترے کوچہ میں پہنچتی

تقدیر تھی یہ بھی کہ ہوا بھی نہ چلی آج

ہے دلوں کا وہی جو دانۂ تسبیح کا حال

یوں ملے ہیں پہ ہیں دراصل جدا ایک سے ایک

ان کو تو سہل ہے وہ غیر کے گھر جائیں گے

ہم جو اس در سے اٹھیں گے تو کدھر جائیں گے

جس جگہ جائیں بنا لیں ترے وحشی صحرا

خاک لے آئے ہیں مٹھی میں بیابانوں کی

ابھی تو آگ سینے میں کہیں کم ہے کہیں زائد

اگر مل پائیں گے آپس میں سب چھالے تو کیا ہوگا