ek chehra hai jo āñkhoñ meñ basā rahtā hai

ik tasavvur hai jo tanhā nahīñ hone detā

ek chehra hai jo aankhon mein basa rahta hai

ek tasawwur hai jo tanha nahin hone deta

jise na aane kī qasmeñ maiñ de ke aayā huuñ

usī ke qadmoñ kī aahaT kā intizār bhī hai

jise na aane ki qasmen main de ke aaya hun

usi ke qadmon ki aahaT ka intizar bhi hai

muddat huī ki zinda huuñ dekhe baġhair use

vo shaḳhs mere dil se utar to nahīñ gayā

muddat hui ki zinda hun dekhe baghair use

wo shaKHs mere dil se utar to nahin gaya

zarā qarīb se dekhūñ to koī raaz khule

yahāñ to har koī lagtā hai aadmī jaisā

zara qarib se dekhun to koi raaz khule

yahan to har koi lagta hai aadmi jaisa

saath chāval ke ye kañkar bhī nigal jaatā hai

bhuuk meñ aadmī patthar bhī nigal jaatā hai

sath chawal ke ye kankar bhi nigal jata hai

bhuk mein aadmi patthar bhi nigal jata hai

chāñd kā qurb lagā kaisā chalo pūchh aa.eñ

āsmānoñ ke safar se vo palaT aayā hai

chand ka qurb laga kaisa chalo puchh aaen

aasmanon ke safar se wo palaT aaya hai

dekhnā chhoḌe nahīñ ḳhvāb mirī āñkhoñ ne

puurā har-chand koī ḳhvāb nahīñ ho paayā

dekhna chhoDe nahin KHwab meri aankhon ne

pura har-chand koi KHwab nahin ho paya

zinda rahne ke liye asbāb de

merī āñkhoñ ko tū apne ḳhvāb de

zinda rahne ke liye asbab de

meri aankhon ko tu apne KHwab de

girne vaalā hai mirā bojh sambhāle koī

apne aañsū mirī palkoñ se uThā le koī

girne wala hai mera bojh sambhaale koi

apne aansu meri palkon se uTha le koi

palkoñ pe le ke bojh kahāñ tak phirā karūñ

a ḳhvāb-e-rā.egāñ maiñ batā terā kyā karūñ

palkon pe le ke bojh kahan tak phira karun

a KHwab-e-raegan main bata tera kya karun

miT jaane ke āsār virāsat meñ mile haiñ

girte dar-o-dīvār virāsat meñ mile haiñ

miT jaane ke aasar wirasat mein mile hain

girte dar-o-diwar wirasat mein mile hain

samajhne se rahā qāsir ki dānista nahīñ samjhā

na jaane kyuuñ hamārī pyaas ko dariyā nahīñ samjhā

samajhne se raha qasir ki danista nahin samjha

na jaane kyun hamari pyas ko dariya nahin samjha

dar-ba-dar ho ga.e ta.abīr kī dhun meñ kitne

in hasīñ ḳhvāboñ se baḌh kar koī saffāk nahīñ

dar-ba-dar ho gae tabir ki dhun mein kitne

in hasin KHwabon se baDh kar koi saffak nahin

be-sāya na ho jaa.e kahīñ ghar mirā yārab

kuchh din se maiñ jhuktā ye shajar dekh rahā huuñ

be-saya na ho jae kahin ghar mera yarab

kuchh din se main jhukta ye shajar dekh raha hun

mujh ko ye mohtāt iḳhlās-e-nazar achchhā lagā

us kī duzdīda nigāhoñ kā safar achchhā lagā

mujh ko ye mohtat iKHlas-e-nazar achchha laga

us ki duzdida nigahon ka safar achchha laga