کبھی کبھی سفر زندگی سے روٹھ کے ہم

ترے خیال کے سائے میں بیٹھ جاتے ہیں

غم نیرنگ دکھاتا ہے ہستی کی جلوہ نمائی کا

کتنے زمانوں کا حاصل ہے اک لمحہ تنہائی کا

یہ آرزو کے ستارے یہ انتظار کے پھول

چمک رہی ہیں خطائیں مہک رہے ہیں گناہ

اپنے غم کی فکر نہ کی اس دنیا کی غم خواری میں

برسوں ہم نے دست جنوں سے کام لیا دانائی کا

تخلیق کے پردے میں ستم ٹوٹ رہے ہیں

آزر ہی کے ہاتھوں سے صنم ٹوٹ رہے ہیں

تھی نظر کے سامنے کچھ تو تلافی کی امید

کھیت سوکھا تھا مگر دریا میں طغیانی تو تھی

آؤ ہم ہنستے اٹھیں بزم دل آزاراں سے

کون احساس کو بیمار بنا کر اٹھے

وہ عرض غم پہ مری ان کا اہتمام سکوت

تمام شورش تفصیل واقعات گئی

خواب دیکھا تھا کہاں چمکی ہے تعبیر کہاں

حشر کا دن مری فطرت کا اجالا نکلا

چھلک اٹھا جو کبھی خون آرزو میرا

مژہ مژہ تری رعنائیوں کی بات گئی