mere sheroñ se mirī umr kā andāza kar

mujh se mat pūchh mirā yaum-e-vilādat kyā hai

mere sheron se meri umr ka andaza kar

mujh se mat puchh mera yaum-e-wiladat kya hai

bārah ghanToñ kī hai ik raat jo Taltī hī nahīñ

hijr bhī ain december meñ milā hai mujh ko

barah ghanTon ki hai ek raat jo Talti hi nahin

hijr bhi ain december mein mila hai mujh ko

beTe masrūf rahe maal ke baTvāre meñ

beTiyāñ baap kī mayyat se lipaT kar roiiñ

beTe masruf rahe mal ke baTware mein

beTiyan bap ki mayyat se lipaT kar roin

maiñ nahīñ māntā kāġhaz pe likhā shajra-e-nasab

baat karne se qabīle kā pata chaltā hai

main nahin manta kaghaz pe likha shajra-e-nasab

baat karne se qabile ka pata chalta hai

zulm bhī sharmā rahā hai adl kī mīzān se

kuud jaanā chāhiye mīnār-e-pākistān se

zulm bhi sharma raha hai adl ki mizan se

kud jaana chahiye minar-e-pakistan se

shā.irī ilm-o-hunar maz.hab siyāsat baad meñ

sab se pahle aadmī insān honā chāhiye

shairi ilm-o-hunar mazhab siyasat baad mein

sab se pahle aadmi insan hona chahiye

us kī bastī se pahle qabristān

āshiqoñ ke liye ishāra thā

us ki basti se pahle qabristan

aashiqon ke liye ishaara tha

ka.ī rang badaltā hai bharosā nahīñ us kā

filhāl vo muḳhlis hai magar zehn meñ rakhnā

kai rang badalta hai bharosa nahin us ka

filhaal wo muKHlis hai magar zehn mein rakhna

ik tirā hijr jo bāloñ meñ safedī laayā

ik tirā shauq jo siine meñ javāñ rahtā hai

ek tera hijr jo baalon mein safedi laya

ek tera shauq jo sine mein jawan rahta hai

na.e kapḌe na.e juute na.e bartan ḳharīdegā

vo apne saare meDal bech kar rāshan ḳharīdegā

nae kapDe nae jute nae bartan KHaridega

wo apne sare meDal bech kar rashan KHaridega

beTiyāñ sab ke muqaddar meñ kahāñ hotī haiñ

ghar ḳhudā ko jo pasand aa.e vahāñ hotī haiñ

beTiyan sab ke muqaddar mein kahan hoti hain

ghar KHuda ko jo pasand aae wahan hoti hain

tumhāre ghar kī fazā sāzgār hai shāyad

tum apnī umr se chhoTe dikhā.ī dete ho

tumhaare ghar ki faza sazgar hai shayad

tum apni umr se chhoTe dikhai dete ho

sab se achchhī hai ye 'mahmūd' adab kī duniyā

zindagānī ke salīqe kā pata chaltā hai

sab se achchhi hai ye 'mahmud' adab ki duniya

zindagani ke saliqe ka pata chalta hai

mirī vafā meñ kamī hai to mujh se baat kare

use kaho ki vo aa.e muzākarāt kare

meri wafa mein kami hai to mujh se baat kare

use kaho ki wo aae muzakaraat kare

din agar merā pareshānī meñ guzre 'mahmūd'

maañ tasallī ke liye ḳhvāb meñ aa jaatī hai

din agar mera pareshani mein guzre 'mahmud'

man tasalli ke liye KHwab mein aa jati hai

aisā kahāñ ye zā.iqa gandum ke paas hai

roTī meñ maañ ke haath kī shāmil miThās hai

aisa kahan ye zaiqa gandum ke pas hai

roTi mein man ke hath ki shamil miThas hai

bārish jise 'mahmūd' samajhtā hai zamāna

insān ke kirdār pe rote haiñ farishte

barish jise 'mahmud' samajhta hai zamana

insan ke kirdar pe rote hain farishte

kyā sochtā hai ḳhud vo kisī maañ kī maut par

taḳhlīq karne vaale se merā savāl hai

kya sochta hai KHud wo kisi man ki maut par

taKHliq karne wale se mera sawal hai

zamīñ kī god meñ maa.eñ bhī jā ke sotī haiñ

zamīn maañ kī bhī maañ hai zamīñ se pyaar karo

zamin ki god mein maen bhi ja ke soti hain

zamin man ki bhi man hai zamin se pyar karo

pahle soyā kartā thā 'mahmūd' lambī taan kar

phir shu.ūr aatā gayā aur ratjage baḌhte ga.e

pahle soya karta tha 'mahmud' lambi tan kar

phir shuur aata gaya aur ratjage baDhte gae

murshid na chhoḌ ham ko hamāre nasīb par

zarḳhez khetiyoñ ko bhī dahqān chāhiye

murshid na chhoD hum ko hamare nasib par

zarKHez khetiyon ko bhi dahqan chahiye

vo is liye ki mohabbat kī rasm zinda rahe

hasīn log ba-kasrat jahāñ meñ bheje ga.e

wo is liye ki mohabbat ki rasm zinda rahe

hasin log ba-kasrat jahan mein bheje gae

kuchh rang tire ruup meñ yūsuf kī tarah haiñ

varna maiñ tire hijr meñ yāqūb na hotā

kuchh rang tere rup mein yusuf ki tarah hain

warna main tere hijr mein yaqub na hota

zāhir huā hai mujh pe yatīmī kī pahlī raat

ab merā jism aadhā hai aadhā nahīñ rahā

zahir hua hai mujh pe yatimi ki pahli raat

ab mera jism aadha hai aadha nahin raha

tujhe bhī phūloñ ke bistar pe ratjage hī mile

uruuj terā bhī mere zavāl jaisā hai

tujhe bhi phulon ke bistar pe ratjage hi mile

uruj tera bhi mere zawal jaisa hai

ik raat us ke haath pe aañsū girā ke dekh

'mahmūd' terā chāñd sitāra-shanās hai

ek raat us ke hath pe aansu gira ke dekh

'mahmud' tera chand sitara-shanas hai

aa ki mazbūt kareñ pyaar kī buniyādoñ ko

ghar shikasta ho to barsāt meñ baT jaatā hai

aa ki mazbut karen pyar ki buniyaadon ko

ghar shikasta ho to barsat mein baT jata hai

chāhiye ek mulāqāt mahīne meñ zarūr

tāzgī halqa-e-ahbāb meñ aa jaatī hai

chahiye ek mulaqat mahine mein zarur

tazgi halqa-e-ahbab mein aa jati hai

itnā sachchā phir na kisī ne pyaar diyā

maañ kī maut ne mujh ko aadhā maar diyā

itna sachcha phir na kisi ne pyar diya

man ki maut ne mujh ko aadha mar diya

ka.ī chakor mire husn ke hisār meñ haiñ

bar-āb-e-sindh bichhī chāñdnī kā beTā huuñ

kai chakor mere husn ke hisar mein hain

bar-ab-e-sindh bichhi chandni ka beTa hun

jal rahe haiñ chāroñ apne apne ātish-dān meñ

sardiyoñ kī shab sitāre ḳhushk īñdhan aur maiñ

jal rahe hain chaaron apne apne aatish-dan mein

sardiyon ki shab sitare KHushk indhan aur main

pahle do-chār suḳhan-var hī huā karte the

ab to har shaḳhs suḳhan-var hai bachā.e maulā

pahle do-chaar suKHan-war hi hua karte the

ab to har shaKHs suKHan-war hai bachae maula

'mahmūd' tum to logoñ ke ho kar hī rah ga.e

apne liye bhī vaqt nikālā karo kabhī

'mahmud' tum to logon ke ho kar hi rah gae

apne liye bhi waqt nikala karo kabhi

ishq vo giit jo umroñ kī riyāzat māñge

kaun is giit ko āsānī se gā saktā hai

ishq wo git jo umron ki riyazat mange

kaun is git ko aasani se ga sakta hai

baiThe haiñ kab sukūn se āshiq-mizāj log

girdāb chāhiyeñ kabhī tūfān chāhiyeñ

baiThe hain kab sukun se aashiq-mizaj log

girdab chahiyen kabhi tufan chahiyen

ab to nāpaid hote jaate haiñ

soch kar baat karne vaale log

ab to napaid hote jate hain

soch kar baat karne wale log

aaj 'mahmūd' ke sar par nahīñ saaya koī

maañ safar par mujhe kartī thī ravāna mire dost

aaj 'mahmud' ke sar par nahin saya koi

man safar par mujhe karti thi rawana mere dost

ism-e-āzam bhī mire saath safar kartā hai

merī kashtī meñ jo baiThegā amaañ pā.egā

ism-e-azam bhi mere sath safar karta hai

meri kashti mein jo baiThega aman paega

tālāb ke paanī meñ ravānī nahīñ hotī

ye baat mirī zindagī bhar zehn meñ rakhnā

talab ke pani mein rawani nahin hoti

ye baat meri zindagi bhar zehn mein rakhna

raat ko ashk diye ḳhuun diyā aaheñ diiñ

phir kahīñ jā ke ye 'mahmūd' ujāle hue haiñ

raat ko ashk diye KHun diya aahen din

phir kahin ja ke ye 'mahmud' ujale hue hain

koī martā nahīñ hai mar ke bhī

qabr sab ke liye nahīñ hotī

koi marta nahin hai mar ke bhi

qabr sab ke liye nahin hoti

raa.e kyā qaa.em kareñge ajnabī us shahr meñ

rasta batlā.e jahāñ par ek andhā aadmī

rae kya qaem karenge ajnabi us shahr mein

rasta batlae jahan par ek andha aadmi

gumnāmiyoñ ke biich utarnā nahīñ mujhe

'mahmūd' jism marnā hai marnā nahīñ mujhe

gumnamiyon ke bich utarna nahin mujhe

'mahmud' jism marna hai marna nahin mujhe

maiñ khaul uThā dekh ke dariyā kā takabbur

yuuñ pyāsā palaTnā mirā maqsūd nahīñ thā

main khaul uTha dekh ke dariya ka takabbur

yun pyasa palaTna mera maqsud nahin tha

mirī tarah se shajar bhī haiñ bāġhiyāna mizāj

jahāñ se kaaTe ga.e the vahīñ se ug aa.e

meri tarah se shajar bhi hain baghiyana mizaj

jahan se kaTe gae the wahin se ug aae

bahut hī soz bahut hī gudāz hai is meñ

tumhārā hijr azān-e-bilāl jaisā hai

bahut hi soz bahut hi gudaz hai is mein

tumhaara hijr azan-e-bilal jaisa hai