نہ نماز آتی ہے مجھ کو نہ وضو آتا ہے

سجدہ کر لیتا ہوں جب سامنے تو آتا ہے

وہی دن ہے ہماری عید کا دن

جو تری یاد میں گزرتا ہے

قتل حسین اصل میں مرگ یزید ہے

اسلام زندہ ہوتا ہے ہر کربلا کے بعد

شکوہ صیاد کا بے جا ہے قفس میں بلبل

یاں تجھے آپ ترا طرز فغاں لایا ہے

ساری دنیا یہ سمجھتی ہے کہ سودائی ہے

اب مرا ہوش میں آنا تری رسوائی ہے

تجھ سے کیا صبح تلک ساتھ نبھے گا اے عمر

شب فرقت کی جو گھڑیوں کا گزرنا ہے یہی

توحید تو یہ ہے کہ خدا حشر میں کہہ دے

یہ بندہ زمانے سے خفا میرے لیے ہے

قید اور قید بھی تنہائی کی

شرم رہ جائے شکیبائی کی

دور حیات آئے گا قاتل قضا کے بعد

ہے ابتدا ہماری تری انتہا کے بعد

ہر سینہ آہ ہے ترے پیکاں کا منتظر

ہو انتخاب اے نگہ یار دیکھ کر