Sher of Meem Maroof Ashraf
jab bhī chūmā hai tire hoñToñ ko
jism se un ko judā jaanā hai
jab bhi chuma hai tere honTon ko
jism se un ko juda jaana hai
abhī āġhāz-e-ulfat hai chalo ik kaam karte haiñ
bichhaḌ kar dekh lete haiñ bichhaḌ kar kaisā lagtā hai
abhi aaghaz-e-ulfat hai chalo ek kaam karte hain
bichhaD kar dekh lete hain bichhaD kar kaisa lagta hai
maze jo terī qurbat ke the saare bhuul baiThe haiñ
mazā furqat meñ terī ham ko itnā aa gayā jānāñ
maze jo teri qurbat ke the sare bhul baiThe hain
maza furqat mein teri hum ko itna aa gaya jaanan
'aql kahtī hai ki saudā hai ziyāñ kā
aur tujhe dil be-tahāshā chāhtā hai
'aql kahti hai ki sauda hai ziyan ka
aur tujhe dil be-tahasha chahta hai
tab jā ke kahīñ zābit-o-mazbūt hue haiñ
ham saal ka.ī ātish-e-dozaḳh meñ jale haiñ
tab ja ke kahin zabit-o-mazbut hue hain
hum sal kai aatish-e-dozaKH mein jale hain
tire hoñToñ kī surḳhī dekh kar to aisā lagtā hai
chabāyā hai kisī 'āshiq kā dil hinda-mizājī se
tere honTon ki surKHi dekh kar to aisa lagta hai
chabaya hai kisi 'ashiq ka dil hinda-mizaji se
avval avval jo dekhtī thiiñ tum
vo hī darkār hai nazar ham ko
awwal awwal jo dekhti thin tum
wo hi darkar hai nazar hum ko
sochtā huuñ kyā mirā bantā ḳhudā ke sāmne
gar na hotā yā-rasūlullah sahārā aap kā
sochta hun kya mera banta KHuda ke samne
gar na hota ya-rasulullah sahaara aap ka
baat aatī hai dostoñ kī jab
mujh ko dushman 'azīz lagte haiñ
baat aati hai doston ki jab
mujh ko dushman 'aziz lagte hain
bahut āsān lafzoñ meñ ye us ne kah diyā ham se
nahīñ tum se mohabbat jaao jo karnā hai so kar lo
bahut aasan lafzon mein ye us ne kah diya hum se
nahin tum se mohabbat jao jo karna hai so kar lo
ye kis tarah kā sitam hai ḳhudā tirā mujh par
mire nasīb koī hādisa nahīñ rakkhā
ye kis tarah ka sitam hai KHuda tera mujh par
mere nasib koi hadisa nahin rakkha
dekhā jamāl-e-yār to maḳhmūr ho ga.e
be-ḳhud haiñ be-piye hī ye aisī sharāb hai
dekha jamal-e-yar to maKHmur ho gae
be-KHud hain be-piye hi ye aisi sharab hai
sar kaTā kar hī surḳh-rūī hai
'ishq bhī karbalā kā maidāñ hai
sar kaTa kar hi surKH-rui hai
'ishq bhi karbala ka maidan hai
tum ko paanā nahīñ mirā maqsad
ab faqat tum ko bhuul jaanā hai
tum ko pana nahin mera maqsad
ab faqat tum ko bhul jaana hai
guzashta saal bhī 'ashraf' yahī ummīd thī ham ko
ki ye jo saal aayā hai ḳhushī kī ghaḌiyāñ lā.egā
guzashta sal bhi 'ashraf' yahi ummid thi hum ko
ki ye jo sal aaya hai KHushi ki ghaDiyan laega
use bhī thā mujhe barbād karnā
mujhe bhī ik fasāna chāhiye thā
use bhi tha mujhe barbaad karna
mujhe bhi ek fasana chahiye tha
deñge ye ahl-e-jurm ko rāhat
be-qusūroñ ko phāñsiyāñ deñge
denge ye ahl-e-jurm ko rahat
be-qusuron ko phansiyan denge
dekho mire sharīr meñ kuchh bhī nahīñ rahā
dekho tumhārā 'ishq mirā khā gayā badan
dekho mere sharir mein kuchh bhi nahin raha
dekho tumhaara 'ishq mera kha gaya badan
abhī to aur baḌhegī ye tishnagī dil kī
abhī to aur bhī zyāda vo yaad ā.eñge
abhi to aur baDhegi ye tishnagi dil ki
abhi to aur bhi zyaada wo yaad aaenge
tumhīñ ko chāheñge zindagī bhar kisī se ulfat nahīñ kareñge
jo kah diyā hai so kah diyā hai na.ī mohabbat nahīñ kareñge
tumhin ko chahenge zindagi bhar kisi se ulfat nahin karenge
jo kah diya hai so kah diya hai nai mohabbat nahin karenge
kab ḳhabar thī ki hayāt-e-'ashraf'
terī zulfoñ meñ ulajh jā.egī
kab KHabar thi ki hayat-e-'ashraf'
teri zulfon mein ulajh jaegi
avval avval to bahut 'aql se uljhegā dil
baa'd phir aap hī dil aap ko samjhā.egā
awwal awwal to bahut 'aql se uljhega dil
ba'd phir aap hi dil aap ko samjhaega
ek hī shaḳhs ibtidā hai mirī
ek hī shaḳhs iḳhtitām mirā
ek hi shaKHs ibtida hai meri
ek hi shaKHs iKHtitam mera
dūriyāñ qurbatoñ kā bā'is haiñ
qurbateñ dūriyāñ baḌhātī haiñ
duriyan qurbaton ka ba'is hain
qurbaten duriyan baDhati hain
laḌī hai aañkh mirī jab se terī āñkhoñ se
sivā.e tere mujhe kuchh nazar nahīñ aatā
laDi hai aankh meri jab se teri aankhon se
siwae tere mujhe kuchh nazar nahin aata
mujh se kahtī hai aaj tum shā'ir
ho agar to mirī badaulat ho
mujh se kahti hai aaj tum sha'ir
ho agar to meri badaulat ho
bint-e-havvā ko bhuul jaa.eñ ham
ye nahīñ aatā ibn-e-ādam ko
bint-e-hawwa ko bhul jaen hum
ye nahin aata ibn-e-adam ko
baḌhte hī jā rahe haiñ tūfān ḳhvāhishoñ ke
hotī hī jā rahī hai mujh meñ kamī tumhārī
baDhte hi ja rahe hain tufan KHwahishon ke
hoti hi ja rahi hai mujh mein kami tumhaari
aur to qāsid nahīñ kuchh un se kahne ke liye
un se bas tū itnā kahnā yaad aanā chhoḌ deñ
aur to qasid nahin kuchh un se kahne ke liye
un se bas tu itna kahna yaad aana chhoD den
irāda phir kisī se kar liyā us ne mohabbat kā
so ab ye dekhnā hai kaun hai zad meñ tabāhī ke
irada phir kisi se kar liya us ne mohabbat ka
so ab ye dekhna hai kaun hai zad mein tabahi ke
kisī ke yaad karne kā agar hotī sabab hichkī
mirā mahbūb ho kar ke pareshāñ mar gayā hotā
kisi ke yaad karne ka agar hoti sabab hichki
mera mahbub ho kar ke pareshan mar gaya hota
kal ibn-e-ādam un pe qurbān ho na jaa.eñ
tauba vo un ke jalve allāh vo nazāre
kal ibn-e-adam un pe qurban ho na jaen
tauba wo un ke jalwe allah wo nazare
afsos mujh ko chhoḌ ke jaane se peshtar
vo jā chukā thā mujh ko ḳhabar baa'd meñ huī
afsos mujh ko chhoD ke jaane se peshtar
wo ja chuka tha mujh ko KHabar ba'd mein hui
vahī sab log 'ashraf' āstīñ ke saañp nikle haiñ
jinheñ shāmil samajhte the tum apne ḳhair-ḳhvāhoñ meñ
wahi sab log 'ashraf' aastin ke sanp nikle hain
jinhen shamil samajhte the tum apne KHair-KHwahon mein
jitnā jaate haiñ duur vo mujh se
aur utnā qarīb hote haiñ
jitna jate hain dur wo mujh se
aur utna qarib hote hain
ek ham haiñ ki vahīñ haiñ ki jahāñ bichhḌe the
ek tū hai ki kabhī yaañ to vahāñ hotā hai
ek hum hain ki wahin hain ki jahan bichhDe the
ek tu hai ki kabhi yan to wahan hota hai
ek bas ham ne tujh ko chāhā thā
aur kyā ham ne tujh se chāhā thā
ek bas hum ne tujh ko chaha tha
aur kya hum ne tujh se chaha tha
maiñ tum se duur rah kar kis tarah ye tum ko samjhā.ūñ
ki mujh se duur rah kar kis qadar ho tum akelī
main tum se dur rah kar kis tarah ye tum ko samjhaun
ki mujh se dur rah kar kis qadar ho tum akeli
aaj tasvīr us kī dekhī hai
aaj phir niiñd kā ziyāñ hogā
aaj taswir us ki dekhi hai
aaj phir nind ka ziyan hoga