ḳhanjar na kamar meñ hai na talvār rakhe hai

āñkhoñ hī meñ chāhe hai jise maar rakhe hai

KHanjar na kamar mein hai na talwar rakhe hai

aankhon hi mein chahe hai jise mar rakhe hai

thā jinheñ husn-parastī se hamesha inkār

vo bhī ab tālib-e-dīdār haiñ kin ke un ke

tha jinhen husn-parasti se hamesha inkar

wo bhi ab talib-e-didar hain kin ke un ke

mujh meñ aur un meñ sabab kyā jo laḌā.ī hogī

ye havā.ī kisī dushman ne uḌaa.ī hogī

mujh mein aur un mein sabab kya jo laDai hogi

ye hawai kisi dushman ne uDai hogi

kyā fusūñ tū ne ḳhudā jaane ye ham par maarā

tujh se phirtā nahīñ dil ham ne bahut sar maarā

kya fusun tu ne KHuda jaane ye hum par mara

tujh se phirta nahin dil hum ne bahut sar mara

aa jaa.e kahīñ baad kā jhoñkā to mazā ho

zālim tire mukhḌe se dupaTTa jo ulaT jaa.e

aa jae kahin baad ka jhonka to maza ho

zalim tere mukhDe se dupaTTa jo ulaT jae

kis jafā-kār se ham ahd-e-vafā kar baiThe

āḳhir is baat ne ik roz pashemān kiyā

kis jafa-kar se hum ahd-e-wafa kar baiThe

aaKHir is baat ne ek roz pasheman kiya

mat muñh se 'nisār' apne ko ai jaan burā kah

hai sāhab-e-ġhairat kahīñ kuchh khā ke na mar jaa.e

mat munh se 'nisar' apne ko ai jaan bura kah

hai sahab-e-ghairat kahin kuchh kha ke na mar jae

juuñ juuñ nahīñ dekhe hai 'nisār' apne sanam ko

tuuñ tuuñ yahī kahtā hai ḳhudā jāniye kyā hai

jun jun nahin dekhe hai 'nisar' apne sanam ko

tun tun yahi kahta hai KHuda jaaniye kya hai

dekhe kahīñ raste meñ khaḌā mujh ko to zid se

aatā ho idhar ko to udhar hī ko palaT jaa.e

dekhe kahin raste mein khaDa mujh ko to zid se

aata ho idhar ko to udhar hi ko palaT jae