javaab detaa hai mere har ik savaal kaa vo magar savaal bhii us kii taraf se hotaa hai

achchhaa hai vo biimaar jo achchhaa nahii.n hotaa jab tajribe hote hai.n to dhokaa nahii.n hotaa jis lafz ko mai.n to.D ke KHud TuuT gayaa huu.n kahtaa bhii to vo us ko gavaaraa nahii.n hotaa terii hii tarah aataa hai aa.nkho.n me.n tiraa KHvaab sachchaa nahii.n hotaa kabhii jhuuTaa nahii.n hotaa takziib-e-junuu.n ke liye ik shak hii bahut hai baarish kaa samay ho to sitaaraa nahii.n hotaa kyaa kyaa dar-o-diivaar mirii KHaak me.n gum hai.n par us ko miraa jism gavaaraa nahii.n hotaa yaa dil nahii.n hotaa mire hone ke sabab se yaa dil ke sabab se miraa honaa nahii.n hotaa kis ruKH se tayaqqun ko tabii.at me.n jagah de.n aisaa nahii.n hotaa kabhii vaisaa nahii.n hotaa ham log jo karte hai.n vo hotaa hii nahii.n hai honaa jo nazar aataa hai honaa nahii.n hotaa jis din ke guzarte hii yahaa.n raat hu.ii hai ai kaash vo din mai.n ne guzaaraa nahii.n hotaa jab ham nahii.n hote yahaa.n aate hai.n taGayyur jab ham yahaa.n hote hai.n zamaanaa nahii.n hotaa ham un me.n hai.n jin kii ko.ii hastii nahii.n hotii ham TuuT bhii jaa.e.n to tamaashaa nahii.n hotaa

havaa charaaG bujhaane lagii to ham ne bhii diye kii lau kii jagah teraa intizaar rakhaa