ham musāfir haiñ kahāñ ghar kī taraf dekhte haiñ

har ghaḌī miil ke patthar kī taraf dekhte haiñ

hum musafir hain kahan ghar ki taraf dekhte hain

har ghaDi mil ke patthar ki taraf dekhte hain

anā-parast huuñ mil jā.ūñ ḳhaak meñ lekin

ḳharīd saktā nahīñ koī maal zar se mujhe

ana-parast hun mil jaun KHak mein lekin

KHarid sakta nahin koi mal zar se mujhe

gar kuchh nahīñ hai yaar tire paas ġham to hai

tū ḳhush-nasīb hai ki tirī aañkh nam to hai

gar kuchh nahin hai yar tere pas gham to hai

tu KHush-nasib hai ki teri aankh nam to hai

raho ghar meñ ziyāda to safar āvāz detā hai

safar meñ jab nikal jaao to ghar āvāz detā hai

raho ghar mein ziyaada to safar aawaz deta hai

safar mein jab nikal jao to ghar aawaz deta hai

aaj dekhā unheñ jab zamāne ke baad

aañkh nam ho ga.ī muskurāne ke baad

aaj dekha unhen jab zamane ke baad

aankh nam ho gai muskurane ke baad

pahle ye sochtā rahtā thā ki tanhā ho jā.ūñ

aaj tanhā huuñ to tanhā.ī se Dar lagtā hai

pahle ye sochta rahta tha ki tanha ho jaun

aaj tanha hun to tanhai se Dar lagta hai

laakh tabdīliyāñ bāzāroñ meñ aa.eñ rahbar

maiñ vo sikka huuñ jo har daur meñ chal jā.ūñgā

lakh tabdiliyan bazaron mein aaen rahbar

main wo sikka hun jo har daur mein chal jaunga

ḳhuun kā ghūñT kabhī zahr piyā hai maiñ ne

zindagī tujh ko bahar-hāl jiyā hai maiñ ne

KHun ka ghunT kabhi zahr piya hai main ne

zindagi tujh ko bahar-haal jiya hai main ne

bikhar gayā huuñ maiñ rishtoñ kī Dor se kaT kar

koī to aa ke sameTe idhar-udhar se mujhe

bikhar gaya hun main rishton ki Dor se kaT kar

koi to aa ke sameTe idhar-udhar se mujhe

jab sāmne nazar ke ho ik husn-e-be-panāh

aise meñ ḳhud ko hosh meñ rakhnā kamāl hai

jab samne nazar ke ho ek husn-e-be-panah

aise mein KHud ko hosh mein rakhna kamal hai

mar ke bhī tujh ko na.ī fikr ke pahlū dūñgā

tū mujhe qatl bhī kar degā to ḳhushbū dūñgā

mar ke bhi tujh ko nai fikr ke pahlu dunga

tu mujhe qatl bhi kar dega to KHushbu dunga

zindagī tū mujhe kis moḌ pe le aa.ī hai

kyā koī aur bhī guzrā hai idhar se pahle

zindagi tu mujhe kis moD pe le aai hai

kya koi aur bhi guzra hai idhar se pahle

log auroñ ke garebāñ pe nazar karte haiñ

ham yahī kaam ba-andāz-e-digar karte haiñ

log auron ke gareban pe nazar karte hain

hum yahi kaam ba-andaz-e-digar karte hain

ham ne kirdār se badlā hai chalan duniyā kā

ham se sīkhe koī tahzīb ravādārī kī

hum ne kirdar se badla hai chalan duniya ka

hum se sikhe koi tahzib rawadari ki

merī āvāz mire jism meñ yuuñ gūñjtī hai

jaise sahrā meñ koī dard kī maarī āvāz

meri aawaz mere jism mein yun gunjti hai

jaise sahra mein koi dard ki mari aawaz

hālāt ham se shahr ke yuuñ pūchhte haiñ log

jaise ham aadmī nahīñ aḳhbār ho ga.e

haalat hum se shahr ke yun puchhte hain log

jaise hum aadmi nahin aKHbar ho gae

anjām-e-hijr kyā hai ye tum ḳhud hī dekh lo

ham intizār-e-yār meñ patthar ke ho ga.e

anjam-e-hijr kya hai ye tum KHud hi dekh lo

hum intizar-e-yar mein patthar ke ho gae

ye roz roz kā jhagḌā fasād Thiik nahīñ

maiñ chāhtā huuñ ki ab ain shiin qaaf karūñ

ye roz roz ka jhagDa fasad Thik nahin

main chahta hun ki ab ain shin qaf karun

sab ta'alluq dhare ke dhare rah ga.e

ek tār-e-nafas TuuT jaane ke baad

sab ta'alluq dhare ke dhare rah gae

ek tar-e-nafas TuT jaane ke baad

masarratoñ ke bahut ās-pās bhī na rahe

ḳhudā kā shukr magar ham udaas bhī na rahe

masarraton ke bahut aas-pas bhi na rahe

KHuda ka shukr magar hum udas bhi na rahe

kahkashāñ chāñd sitāre haiñ faqat naqsh-e-qadam

dekhte jaao kahāñ tak hai rasā.ī merī

kahkashan chand sitare hain faqat naqsh-e-qadam

dekhte jao kahan tak hai rasai meri

jis ko dekho vo baḌhā jaatā hai sū-e-manzil

kis ko fursat jo mire paañv ke chhāle dekhe

jis ko dekho wo baDha jata hai su-e-manzil

kis ko fursat jo mere panw ke chhaale dekhe

sharīfāna rakho kirdār lekin

sharāfat buzdilī hone na paa.e

sharifana rakho kirdar lekin

sharafat buzdili hone na pae

ye duniyā hai yahāñ kuchh bhī ho lekin

vahāñ sharmindagī hone na paa.e

ye duniya hai yahan kuchh bhi ho lekin

wahan sharmindagi hone na pae

allāh ne baḳhshī hai mujhe aisī basīrat

dariyā bhī huā jaatā hai qatra mire aage

allah ne baKHshi hai mujhe aisi basirat

dariya bhi hua jata hai qatra mere aage

zer-e-asar nahīñ hai kisī rahnumā ke ham

mālik isī liye haiñ ḳhud apnī razā ke ham

zer-e-asar nahin hai kisi rahnuma ke hum

malik isi liye hain KHud apni raza ke hum

dil hī TuuTā ho kuchh ajab to nahīñ

ashk āñkhoñ meñ be-sabab to nahīñ

dil hi TuTa ho kuchh ajab to nahin

ashk aankhon mein be-sabab to nahin

sar-e-aflāk hogī ruuh miTTī meñ badan hogā

kareñge qadr ik din yuuñ zamīn-o-āsmāñ merī

sar-e-aflak hogi ruh miTTi mein badan hoga

karenge qadr ek din yun zamin-o-asman meri

us kī taraf se merī taraf aa rahe haiñ log

aahaT ye lag rahī hai kisī inqalāb kī

us ki taraf se meri taraf aa rahe hain log

aahaT ye lag rahi hai kisi inqalab ki

ye us se rabt-o-zabt baḌhāne kā hai sila

us kī ḳhatā ko merī ḳhatā mānte haiñ log

ye us se rabt-o-zabt baDhane ka hai sila

us ki KHata ko meri KHata mante hain log

jab sadā suur kī gūñjegī zamāne-bhar meñ

ik farishte meñ simaT aa.egī saarī āvāz

jab sada sur ki gunjegi zamane-bhar mein

ek farishte mein simaT aaegi sari aawaz

hamīñ pe ḳhatm hai me.ār-e-gulshan-e-hastī

hamāre baad na ḳhushbū chaman se aa.egī

hamin pe KHatm hai mear-e-gulshan-e-hasti

hamare baad na KHushbu chaman se aaegi

jab arsh-e-muallā pe mire naqsh-e-qadam haiñ

kyā chiiz hai phir auj-e-surayyā mire aage

jab arsh-e-mualla pe mere naqsh-e-qadam hain

kya chiz hai phir auj-e-surayya mere aage

har taraf bikhrī haiñ armānoñ kī lāsheñ duur tak

zindagī ik jang kā maidān ho kar rah ga.ī

har taraf bikhri hain armanon ki lashen dur tak

zindagi ek jang ka maidan ho kar rah gai