shāyad mizāj ham se mukaddar hai yaar kā

likkhā hai us ne ham ko ba-ḳhatt-e-ġhubār ḳhat

shayad mizaj hum se mukaddar hai yar ka

likkha hai us ne hum ko ba-KHatt-e-ghubar KHat

jo tere gunah baḳhshegā vaa.iz vo mire bhī

kyā terā ḳhudā aur hai bande kā ḳhudā aur

jo tere gunah baKHshega waiz wo mere bhi

kya tera KHuda aur hai bande ka KHuda aur

na laḌāo nazar raqīboñ se

kaam achchhā nahīñ laḌā.ī kā

na laDao nazar raqibon se

kaam achchha nahin laDai ka

aañkh apnī tirī abrū pe jamī rahtī hai

roz is bait pe ham saad kiyā karte haiñ

aankh apni teri abru pe jami rahti hai

roz is bait pe hum sad kiya karte hain

har ik fiqre pe hai jhiḌkī to hai har baat par gaalī

tum aise ḳhūb-sūrat ho ke itne bad-zabāñ kyuuñ ho

har ek fiqre pe hai jhiDki to hai har baat par gali

tum aise KHub-surat ho ke itne bad-zaban kyun ho

chaar bose to diyā kījiye tanḳhvāh mujhe

ek bose pe mirā ḳhaak guzārā hogā

chaar bose to diya kijiye tanKHwah mujhe

ek bose pe mera KHak guzara hoga

hidāyat shaiḳh karte the bahut bahr-e-namāz akasr

jo paḌhnā bhī paḌī to ham ne Taalī be-vazū barsoñ

hidayat shaiKH karte the bahut bahr-e-namaz akasr

jo paDhna bhi paDi to hum ne Tali be-wazu barson

qashqa nahīñ peshānī pe us māh-jabīñ ke

allāh ne ye husn ke ḳhirman ko hai chāñkā

qashqa nahin peshani pe us mah-jabin ke

allah ne ye husn ke KHirman ko hai chanka

malak-ul-maut mo.azzin hai mirā vasl kī raat

dam nikal jaatā hai jab vaqt-e-azāñ aatā hai

malak-ul-maut moazzin hai mera wasl ki raat

dam nikal jata hai jab waqt-e-azan aata hai

hujūm-e-ranj-o-ġham-o-dard hai marūñ kyūñkar

qadam uThā.ūñ jo aage kushāda raah mile

hujum-e-ranj-o-gham-o-dard hai marun kyunkar

qadam uThaun jo aage kushada rah mile

kāfir ho phir jo shar.a kā kuchh bhī kare ḳhayāl

jab jaam bhar ke haath se yaar apne de sharāb

kafir ho phir jo shara ka kuchh bhi kare KHayal

jab jam bhar ke hath se yar apne de sharab