یقیناً رہبر منزل کہیں پر راستا بھولا

وگرنہ قافلے کے قافلے گم ہو نہیں سکتے

آ دوست ساتھ آ در ماضی سے مانگ لائیں

وہ اپنی زندگی کہ جواں بھی حسیں بھی تھی

کتنے پر ہول اندھیروں سے گزر کر اے دوست

ہم ترے حسن کی رخشندہ سحر تک پہنچے

یہ بھی ہوا کہ در نہ ترا کر سکے تلاش

یہ بھی ہوا کہ ہم ترے در سے گزر گئے

صبح بچھڑ کر شام کا وعدہ شام کا ہونا سہل نہیں

ان کی تمنا پھر کر لینا صبح کو پہلے شام کرو

افسوس کسی سے مٹ نہ سکی انسان کے دل کی تشنہ لبی

شبنم ہے کہ رویا کرتی ہے بادل ہیں کہ برسا کرتے ہیں

دل میں کیا کیا گماں گزرتے ہیں

مسکراؤ نہ بات سے پہلے

برسوں سے ترا ذکر ترا نام نہیں ہے

لیکن یہ حقیقت ہے کہ آرام نہیں ہے

موسم گل ہے بادل چھائے کھنک رہے ہیں پیمانے

کیسی توبہ، توبہ توبہ، توبہ نذر جام کرو

سن اے کوہ و دمن کو سبز خلعت بخشنے والے

نہیں ملتا ترے در سے غریبوں کو کفن اب تک

یہ دل والوں سے پوچھو اس کو دل والے سمجھتے ہیں

بگاڑ آئی ہوا زلفیں کسی کی یا سنوار آئی

کل جو ذکر جام و مینا آ گیا

میری توبہ کو پسینا آ گیا

شوق کتنے فریب دیتا ہے

مسکرا کر ہمارا نام نہ لے

ناہید و قمر نے راتوں کے احوال کو روشن کر تو دیا

وہ دیپ کسی سے جل نہ سکے جو دل میں اجالا کرتے ہیں

وہ دن گزرے کہ جب یہ زندگانی اک کہانی تھی

مجھے اب ہر کہانی زندگی معلوم ہوتی ہے

قفس بھی ہے یہاں صیاد بھی گلچیں بھی کانٹے بھی

چمن کو ہم سمجھتے ہیں مگر اپنا چمن اب تک

کچھ حسن کے فسانے ترتیب دے رہا ہوں

دفتر الٹ رہا ہوں ہر پھول ہر کلی کا

کلی کی خو ہے بہرحال مسکرانے کی

وگرنہ راس کسے ہے ہوا زمانے کی

اب بھی جو لوگ سر دار نظر آتے ہیں

کچھ وہی محرم اسرار نظر آتے ہیں

موج تخیل گل کا تبسم پرتو شبنم بجلی کا سایہ

دھوکا ہے دھوکا نام جوانی اس کو جوانی کوئی نہ سمجھے

تو نے وہ سوز دیا ہے کہ الٰہی توبہ

زندگی آگ کے شعلوں میں بسر ہوتی ہے

بسر کرے جو مجاہدانہ حیات اسے دائمی ملے گی

نہ بھیک میں زندگی ملی ہے نہ بھیک میں زندگی ملے گی

اے عقل ساتھ رہ کہ پڑے گا تجھی سے کام

راہ طلب کی منزل آخر جنوں نہیں

چھپے تو کیسے چھپے چمن میں مرا ترا ربط والہانہ

کلی کلی حسن کی کہانی نظر نظر عشق کا فسانہ

نگاہوں سے نا آشنا چند جلوے

پس لالہ و یاسمن اور بھی ہیں

بہار ہو کہ موج مے کہ طبع کی روانیاں

جدھر سے وہ گزر گئے ابل پڑیں جوانیاں