maanā ki zalzala thā yahāñ kam bahut hī kam

bastī meñ bach ga.e the makāñ kam bahut hī kam

mana ki zalzala tha yahan kam bahut hi kam

basti mein bach gae the makan kam bahut hi kam

āstīnoñ meñ chhupā kar saañp bhī laa.e the log

shahr kī is bhiiḌ meñ kuchh log bāzīgar bhī the

aastinon mein chhupa kar sanp bhi lae the log

shahr ki is bhiD mein kuchh log bazigar bhi the

koī dastak na koī aahaT thī

muddatoñ vahm ke shikār the ham

koi dastak na koi aahaT thi

muddaton wahm ke shikar the hum

āsūdgī ne thapkiyāñ de kar sulā diyā

ghar kī zarūratoñ ne jagāyā to Dar lagā

aasudgi ne thapkiyan de kar sula diya

ghar ki zaruraton ne jagaya to Dar laga

ḳhvāhishoñ kī aañch meñ tapte badan kī lazzateñ haiñ

aur vahshī raat hai gumrāhiyāñ sar par uThā.e

KHwahishon ki aanch mein tapte badan ki lazzaten hain

aur wahshi raat hai gumrahiyan sar par uThae

surḳh mausam kī kahānī to purānī ho ga.ī

khul gayā mausam to saare shahr meñ charchā huā

surKH mausam ki kahani to purani ho gai

khul gaya mausam to sare shahr mein charcha hua

barf-manzar dhuul ke bādal havā ke qahqahe

jo kabhī dahlīz ke bāhar the vo andar bhī the

barf-manzar dhul ke baadal hawa ke qahqahe

jo kabhi dahliz ke bahar the wo andar bhi the

chāhtā hai dil kisī se raaz kī bāteñ kare

phuul aadhī raat kā āñgan meñ hai mahkā huā

chahta hai dil kisi se raaz ki baaten kare

phul aadhi raat ka aangan mein hai mahka hua

raat ham ne jugnuoñ kī sab dukāneñ bech diiñ

sub.h ko nīlām karne ke liye kuchh ghar bhī the

raat hum ne jugnuon ki sab dukanen bech din

subh ko nilam karne ke liye kuchh ghar bhi the