zuleḳhā be-ḳhirad āvāra lailā bad-maza shīrīñ

sabhī majbūr haiñ dil se mohabbat aa hī jaatī hai

zuleKHa be-KHirad aawara laila bad-maza shirin

sabhi majbur hain dil se mohabbat aa hi jati hai

ho mohabbat kī ḳhabar kuchh to ḳhabar phir kyuuñ ho

ye bhī ik be-ḳhabarī hai ki ḳhabar rakhte haiñ

ho mohabbat ki KHabar kuchh to KHabar phir kyun ho

ye bhi ek be-KHabari hai ki KHabar rakhte hain

tū hai harjā.ī to apnā bhī yahī taur sahī

tū nahīñ aur sahī aur nahīñ aur sahī

tu hai harjai to apna bhi yahi taur sahi

tu nahin aur sahi aur nahin aur sahi

tujh se ai zindagī ghabrā hī chale the ham to

par tashaffī hai ki ik dushman-e-jāñ rakhte haiñ

tujh se ai zindagi ghabra hi chale the hum to

par tashaffi hai ki ek dushman-e-jaan rakhte hain

muusā ke sar pe paañv hai ahl-e-nigāh kā

us kī galī meñ ḳhaak uḌī koh-e-tūr kī

musa ke sar pe panw hai ahl-e-nigah ka

us ki gali mein KHak uDi koh-e-tur ki