تیرے نغموں سے ہے رگ رگ میں ترنم پیدا

عشرت روح ہے ظالم تری آواز نہیں

آنکھ تمہاری مست بھی ہے اور مستی کا پیمانہ بھی

ایک چھلکتے ساغر میں مے بھی ہے اور مے خانہ بھی

یہی صہبا یہی ساغر یہی پیمانہ ہے

چشم ساقی ہے کہ مے خانے کا مے خانہ ہے

وہ مری خاک نشینی کے مزے کیا جانے

جو مری طرح تری راہ میں برباد نہیں

خراماں خراماں معطر معطر

نسیم آ رہی ہے کہ وہ آ رہے ہیں

دل کی بربادیوں کا رونا کیا

ایسے کتنے ہی واقعات ہوئے

کافر گیسو والوں کی رات بسر یوں ہوتی ہے

حسن حفاظت کرتا ہے اور جوانی سوتی ہے

نظر کرم کی فراوانیوں پہ پڑتی ہے

پھر اپنے دامن خاکی کو دیکھتا ہوں میں

ڈھونڈھنے کو تجھے او میرے نہ ملنے والے

وہ چلا ہے جسے اپنا بھی پتا یاد نہیں

سجدے مری جبیں کے نہیں اس قدر حقیر

کچھ تو سمجھ رہا ہوں ترے آستاں کو میں

گل اپنے غنچے اپنے گلستاں اپنا بہار اپنی

گوارا کیوں چمن میں رہ کے ظلم باغباں کر لیں

تخلیق اندھیروں سے کئے ہم نے اجالے

ہر شب کو اک ایوان سحر ہم نے بنایا

حیرت سے تک رہا ہے جہان وفا مجھے

تم نے بنا دیا ہے محبت میں کیا مجھے

سیلاب تبسم سے درمان جراحت کر

ٹکڑے دل بسمل کے آلودۂ خوں کب تک

حسن نے دست کرم کھینچ لیا ہے کیا خوب

اب مجھے بھی ہوس لذت آزار نہیں

وہ سوال لطف پر پتھر نہ برسائیں تو کیوں

ان کو پروائے شکست کاسۂ سائل نہیں