عجیب ہوتے ہیں آداب رخصت محفل

کہ وہ بھی اٹھ کے گیا جس کا گھر نہ تھا کوئی

یہ مرنا جینا بھی شاید مجبوری کی دو لہریں ہیں

کچھ سوچ کے مرنا چاہا تھا کچھ سوچ کے جینا چاہا ہے

ہم کو جنت کی فضا سے بھی زیادہ ہے عزیز

یہی بے رنگ سی دنیا یہی بے مہر سے لوگ

جسے گزار گئے ہم بڑے ہنر کے ساتھ

وہ زندگی تھی ہماری ہنر نہ تھا کوئی

محفل آرائی ہماری نہیں افراط کا نام

کوئی ہو یا کہ نہ ہو آپ تو آئے ہوئے ہیں

دلوں کا حال تو یہ ہے کہ ربط ہے نہ گریز

محبتیں تو گئیں تھی عداوتیں بھی گئیں

جانے کیوں رنگ بغاوت نہیں چھپنے پاتا

ہم تو خاموش بھی ہیں سر بھی جھکائے ہوئے ہیں

صدا اپنی روش اہل زمانہ یاد رکھتے ہیں

حقیقت بھول جاتے ہیں فسانہ یاد رکھتے ہیں

کیسی کیسی محفلیں سونی ہوئیں

پھر بھی دنیا کس قدر آباد ہے

شاید کہ وہ واقف نہیں آداب سفر سے

پانی میں جو قدموں کے نشاں ڈھونڈ رہا تھا

تنگ آتے بھی نہیں کشمکش دہر سے لوگ

کیا تماشا ہے کہ مرتے بھی نہیں زہر سے لوگ

شکوۂ تلخئ حالات بجا ہے لیکن

اس پہ روتا ہوں کہ میں نے بھی رلایا ہے تجھے

نہ اب وہ شدت آوارگی نہ وحشت دل

ہمارے نام کی کچھ اور شہرتیں بھی گئیں

تری آرزو سے بھی کیوں نہیں غم زندگی میں کوئی کمی

یہ سوال وہ ہے کہ جس کا اب کوئی اک جواب نہیں رہا

موت کے بعد زیست کی بحث میں مبتلا تھے لوگ

ہم تو سحرؔ گزر گئے تہمت زندگی اٹھائے

مرے لہو کو مری خاک ناگزیر کو دیکھ

یونہی سلیقۂ عرض ہنر نہیں آیا