merī mazdūrī ke paise mujhe de do mālik

aaj beTī mirī sasurāl se aa.ī huī hai

meri mazduri ke paise mujhe de do malik

aaj beTi meri sasural se aai hui hai

raat bastī jalī ġharīboñ kī

sub.h aḳhbār ho ga.e raushan

raat basti jali gharibon ki

subh aKHbar ho gae raushan

aur thoḌā sā zahr ghulne do

aadmī aadmī ko tarsegā

aur thoDa sa zahr ghulne do

aadmi aadmi ko tarsega

miyāñ majnūñ to kab ke mar chuke haiñ

magar hāthoñ meñ patthar hai abhī tak

miyan majnun to kab ke mar chuke hain

magar hathon mein patthar hai abhi tak

qusūr in shā'iroñ kā bhī nahīñ hai

vahī deñge jo ye bāzār bole

qusur in sha'iron ka bhi nahin hai

wahi denge jo ye bazar bole

jo mire sochne kī bāteñ haiñ

dūsre sochte haiñ mere liye

jo mere sochne ki baaten hain

dusre sochte hain mere liye

in ġharīb logoñ kī ye 'ajīb mushkil hai

sar jhukā ke kahte haiñ sar nahīñ jhukā.eñge

in gharib logon ki ye 'ajib mushkil hai

sar jhuka ke kahte hain sar nahin jhukaenge

vo merī teġh se martā to kyā maza aatā

usī ke tiir se us kā shikār karnā thā

wo meri tegh se marta to kya maza aata

usi ke tir se us ka shikar karna tha

qadam qadam pe mire ḳhvāb jal rahe haiñ yahāñ

maiñ is zamīn ko jannat banāne aayā thā

qadam qadam pe mere KHwab jal rahe hain yahan

main is zamin ko jannat banane aaya tha

koī jaldī nahīñ hai soch lenā

abhī inkār kī gunjā.isheñ haiñ

koi jaldi nahin hai soch lena

abhi inkar ki gunjaishen hain