peḌ ke nīche zarā sī chhāñv jo us ko milī

so gayā mazdūr tan par boriyā oḌhe hue

peD ke niche zara si chhanw jo us ko mili

so gaya mazdur tan par boriya oDhe hue

saroñ pe oḌh ke mazdūr dhuup kī chādar

ḳhud apne sar pe use sā.ebāñ samajhne lage

saron pe oDh ke mazdur dhup ki chadar

KHud apne sar pe use saeban samajhne lage

kisī ko maar ke ḳhush ho rahe haiñ dahshat-gard

kahīñ pe shām-e-ġharībāñ kahīñ divālī hai

kisi ko mar ke KHush ho rahe hain dahshat-gard

kahin pe sham-e-ghariban kahin diwali hai

ham aise dasht kā tālāb haiñ jahāñ paanī

koī bhī sher ho gardan jhukā ke piitā hai

hum aise dasht ka talab hain jahan pani

koi bhi sher ho gardan jhuka ke pita hai

sab ek jaisī haiñ duniyā kī ‘aurateñ lekin

tumhāre Dasne kā andāz muḳhtalif Thahrā

sab ek jaisi hain duniya ki ‘auraten lekin

tumhaare Dasne ka andaz muKHtalif Thahra

us ne hoñToñ pe lab rakhe bhī na the

mujh meñ sūraj tulū' hone lagā

us ne honTon pe lab rakhe bhi na the

mujh mein suraj tulu' hone laga

kabhī milo to dikhā.ūñ udāsiyoñ kā safar

jinheñ maiñ ruuh kī gahrā.iyoñ meñ rakhtā huuñ

kabhi milo to dikhaun udasiyon ka safar

jinhen main ruh ki gahraiyon mein rakhta hun

ruḳh pe aa jaatā hai jis roz tamanna kā buḳhār

raat ho jaatī hai chehra mujhe dhote dhote

ruKH pe aa jata hai jis roz tamanna ka buKHar

raat ho jati hai chehra mujhe dhote dhote

puurī duniyā mujhe fankār samajhtī hai to kyā

mere ghar vaale to nākāra samajhte haiñ mujhe

puri duniya mujhe fankar samajhti hai to kya

mere ghar wale to nakara samajhte hain mujhe

tumheñ bhī ek din maiñ DhūñDhtā huā aatā

magar ye ruuh kisī aur ke hisār meñ hai

tumhein bhi ek din main DhunDhta hua aata

magar ye ruh kisi aur ke hisar mein hai

qafas ke band parinde haiñ jin kī āñkhoñ meñ

asīrī ghūmtī rahtī hai qaid-ḳhānoñ kī

qafas ke band parinde hain jin ki aankhon mein

asiri ghumti rahti hai qaid-KHanon ki

shajar pe baiThe parindoñ kā shor kāTtā hai

daraḳht ko mire ghar se ukhāḌ de koī

shajar pe baiThe parindon ka shor kaTta hai

daraKHt ko mere ghar se ukhaD de koi

siyāh shab meñ charāġhoñ se dostī karnā

hameñ pasand nahīñ ghar meñ dushmanī karnā

siyah shab mein charaghon se dosti karna

hamein pasand nahin ghar mein dushmani karna

aaj maiñ aa.ina na dekhūñgā

is meñ sīrat dikhā.ī detī hai

aaj main aaina na dekhunga

is mein sirat dikhai deti hai

mirī āñkheñ yahāñ tanhā paḌī haiñ

to us kā kaun pīchhā kar rahā hai

meri aankhen yahan tanha paDi hain

to us ka kaun pichha kar raha hai