کسی کو مار کے خوش ہو رہے ہیں دہشت گرد

کہیں پہ شام غریباں کہیں دوالی ہے

پیڑ کے نیچے ذرا سی چھاؤں جو اس کو ملی

سو گیا مزدور تن پر بوریا اوڑھے ہوئے

سروں پہ اوڑھ کے مزدور دھوپ کی چادر

خود اپنے سر پہ اسے سائباں سمجھنے لگے

ہم ایسے دشت کا تالاب ہیں جہاں پانی

کوئی بھی شیر ہو گردن جھکا کے پیتا ہے

قفس کے بند پرندے ہیں جن کی آنکھوں میں

اسیری گھومتی رہتی ہے قید خانوں کی

سب ایک جیسی ہیں دنیا کی عورتیں لیکن

تمہارے ڈسنے کا انداز مختلف ٹھہرا

کبھی ملو تو دکھاؤں اداسیوں کا سفر

جنہیں میں روح کی گہرائیوں میں رکھتا ہوں

شجر پہ بیٹھے پرندوں کا شور کاٹتا ہے

درخت کو مرے گھر سے اکھاڑ دے کوئی

اس نے ہونٹوں پہ لب رکھے بھی نہ تھے

مجھ میں سورج طلوع ہونے لگا

پوری دنیا مجھے فنکار سمجھتی ہے تو کیا

میرے گھر والے تو ناکارہ سمجھتے ہیں مجھے

تمہیں بھی ایک دن میں ڈھونڈھتا ہوا آتا

مگر یہ روح کسی اور کے حصار میں ہے

رخ پہ آ جاتا ہے جس روز تمنا کا بخار

رات ہو جاتی ہے چہرہ مجھے دھوتے دھوتے

آج میں آئینہ نہ دیکھوں گا

اس میں سیرت دکھائی دیتی ہے

سیاہ شب میں چراغوں سے دوستی کرنا

ہمیں پسند نہیں گھر میں دشمنی کرنا

مری آنکھیں یہاں تنہا پڑی ہیں

تو اس کا کون پیچھا کر رہا ہے