ab kahāñ jā.eñge ai dillī tujhe ham chhoḌ kar

terī ḳhātir sab galī kūchoñ kā dil toḌ aa.e haiñ

ab kahan jaenge ai dilli tujhe hum chhoD kar

teri KHatir sab gali kuchon ka dil toD aae hain

kānoñ meñ gūñjtī hai vo āvāz dam-ba-dam

ik haath rah gayā hai kahīñ haath chhoḌ kar

kanon mein gunjti hai wo aawaz dam-ba-dam

ek hath rah gaya hai kahin hath chhoD kar

kahte haiñ aise vaqt meñ vājib hai jhuuT bhī

tū jhuuT koī bol ki dil phir se jī uThe

kahte hain aise waqt mein wajib hai jhuT bhi

tu jhuT koi bol ki dil phir se ji uThe

ye saare zaḳhmī gūñge haiñ

ye saarī duniyā andhī hai

ye sare zaKHmi gunge hain

ye sari duniya andhi hai

shamshīr ba-kaf huuñ na koī jism meñ jumbish

maiñ kis ke muqābil huuñ ki maarā nahīñ jaatā

shamshir ba-kaf hun na koi jism mein jumbish

main kis ke muqabil hun ki mara nahin jata

nashsha-e-hosh chaḌhā jaatā hai rafta rafta

zindagī phir se huī jaatī hai mub.ham mub.ham

nashsha-e-hosh chaDha jata hai rafta rafta

zindagi phir se hui jati hai mubham mubham

dil-zamīneñ 'ishq ke mausam meñ ḳhālī ho ga.iiñ

ug rahī haiñ un pe ab be-mausamī tanhā.iyāñ

dil-zaminen 'ishq ke mausam mein KHali ho gain

ug rahi hain un pe ab be-mausami tanhaiyan

chaak pe rakkhī hai ye duniyā

kūza-gar behosh paḌā hai

chaak pe rakkhi hai ye duniya

kuza-gar behosh paDa hai

koī nahīñ jo uñgliyoñ se dard khīñchtā

apnā hī haath pher liyā sar pe bārhā

koi nahin jo ungliyon se dard khinchta

apna hi hath pher liya sar pe barha

ham raahī iklaute the aur vaqt kī piiTh pe baiThe the

din nikle tak manzil pā lī shaam talak ruḳh moḌ liyā

hum rahi iklaute the aur waqt ki piTh pe baiThe the

din nikle tak manzil pa li sham talak ruKH moD liya

ab to vahāñ haiñ jis kā bayāñ bhī hai lā-vajūd

sadmoñ pe haa.e haa.e kare ab vo dil kahāñ

ab to wahan hain jis ka bayan bhi hai la-wajud

sadmon pe hae hae kare ab wo dil kahan

shauq meñ pahnī thī bas zanjīr kyā mā'lūm thā

beḌiyoñ kī shakl le legī ye nāgin ek din

shauq mein pahni thi bas zanjir kya ma'lum tha

beDiyon ki shakl le legi ye nagin ek din

havā hai āsmāñ hai aag hai paanī hai miTTī hai

nuqūsh-e-yār gar hote to maiñ duniyā banā letā

hawa hai aasman hai aag hai pani hai miTTi hai

nuqush-e-yar gar hote to main duniya bana leta