اے ہوا تو ہی اسے عید مبارک کہیو

اور کہیو کہ کوئی یاد کیا کرتا ہے

تم جسے چاند کہتے ہو وہ اصل میں

آسماں کے بدن پر کوئی گھاؤ ہے

کتنی دل کش ہیں یہ بارش کی پھواریں لیکن

ایسی بارش میں مری جان بھی جا سکتی ہے

محبت میں شکایت کر رہا ہوں

شکایت میں محبت کر رہا ہوں

جسے تم ڈھونڈتی رہتی ہو مجھ میں

وہ لڑکا جانے کب کا مر چکا ہے

نیند آئے تو کچھ سراغ ملے

کون ہے دفن میرے خوابوں میں

شعر پڑھتے ہوئے یہ تم نے کبھی سوچا ہے

شعر کہتے ہوئے میں کتنی دفع مرتا ہوں

یہ بارش کب رکے گی کون جانے

کہیں میں مر نہ جاؤں تشنگی سے

ایک کردار نیا روز جیا کرتا ہوں

مجھ کو شاعر نہ کہو ایک اداکار ہوں میں

ایک تصویر بنائی ہے خیالوں نے ابھی

اور تصویر سے اک شخص نکل آیا ہے

کسی پر بھی یقیں کر لیتے ہو تم

تمہارے ساتھ کیا دھوکہ ہوا ہے

کئی لاشیں ہیں مجھ میں دفن یعنی

میں قبرستان ہوں شروعات ہی سے

تم مرے پاس نہ آؤ کہ یہی بہتر ہے

پاس آنے سے تو پہچان بھی جا سکتی ہے

عمر بھر لڑتا رہا ہوں اس سے

وہ جو اک شخص کبھی تھا ہی نہیں

جن سے ملنا نہ ہوا ان سے بچھڑ کر روئے

ہم تو آنکھوں کی ہر اک حد سے گزر کر روئے

پیاس ایسی تھی کہ میں سارا سمندر پی گیا

پر مرے ہونٹوں کے یہ دونوں کنارے جل گئے

میں حاصل ہو چکا ہوں جس بدن کو

اسی سے پوچھتا ہوں کیا ملا ہے

میں ترے جسم کے جب پار نکل جاؤں گا

وصل کی رات بڑی غور طلب ہوگی وہ

قتل کرنا ہے نئے خواب کا سو ڈرتا ہوں

کانپ جائیں نہ مرے ہاتھ یہ خوں کرتے ہوئے

جب سے گزرا ہے کسی حسن کے بازار سے دل

دل کو محسوس یہ ہوتا ہے کہ بازار ہوں میں

روح ہے ترجمہ پانیوں کا اگر

جسم یعنی سمندر میں اک ناؤ ہے

میں اپنے درمیاں سے ہٹ چکا ہوں

تو پھر کیا درمیاں رکھا ہوا ہے