ho 'mīr' kā zamāna ki maujūda vaqt ho

dillī se lakhna.ū kī hamesha Thanī rahī

ho 'mir' ka zamana ki maujuda waqt ho

dilli se lakhnau ki hamesha Thani rahi

diyā bujhāne kī fitrat badal bhī saktī hai

koī charāġh havā par dabāo to Daale

diya bujhane ki fitrat badal bhi sakti hai

koi charagh hawa par dabao to Dale

nishāñ kyoñ DhūñDhte ho uñgliyoñ ke

qazā aa.ī thī dastāne pahan kar

nishan kyon DhunDhte ho ungliyon ke

qaza aai thi dastane pahan kar

ustād-e-mohtaram ne kī islāh she'r kī

lekin halāk she'r kā mafhūm kar diyā

ustad-e-mohtaram ne ki islah she'r ki

lekin halak she'r ka mafhum kar diya

kifāyat se tumheñ ham sochte haiñ

raqam yādoñ kī ab tak chal rahī hai

kifayat se tumhein hum sochte hain

raqam yaadon ki ab tak chal rahi hai

koī bashar kabhī paanī banā nahīñ saktā

ḳhudā ke hone kā pahlā subūt paanī hai

koi bashar kabhi pani bana nahin sakta

KHuda ke hone ka pahla subut pani hai

tumhāre chehre kī saarī naseñ tanī huī haiñ

tumhāre haath meñ kyā aa.ina diyā gayā hai

tumhaare chehre ki sari nasen tani hui hain

tumhaare hath mein kya aaina diya gaya hai

qabza kisī kā paanī pe jaarī na rah sakā

lekin hamārā pyaas pe qabza abhī bhī hai

qabza kisi ka pani pe jari na rah saka

lekin hamara pyas pe qabza abhi bhi hai

aao paanī kā fātiha paḌh leñ

us kī āñkhoñ kā mar gayā paanī

aao pani ka fatiha paDh len

us ki aankhon ka mar gaya pani

ġhamoñ par us ke kabhī e'tibār mat karnā

vo pyaaz kaaT ke aañsū nikāl letā hai

ghamon par us ke kabhi e'tibar mat karna

wo pyaz kaT ke aansu nikal leta hai

dīdār ke sikke jo zarā bhīkh meñ māñge

to us ne kahā jaao jumerāt ko aanā

didar ke sikke jo zara bhikh mein mange

to us ne kaha jao jumeraat ko aana

peḌ par kyā salāḳh niklegī

kal zamīnoñ meñ kiil boī thī

peD par kya salaKH niklegi

kal zaminon mein kil boi thi

neze kī nok terā tah-e-dil se shukriya

ab tak girā nahīñ hai mirā sar zamīn par

neze ki nok tera tah-e-dil se shukriya

ab tak gira nahin hai mera sar zamin par

ġhazloñ ke she'r likhne se pahle hazār baar

ham dekhte haiñ aap kī tasvīr kī taraf

ghazlon ke she'r likhne se pahle hazar bar

hum dekhte hain aap ki taswir ki taraf