سانس لینے کو ہی جینا نہیں کہتے ہیں ظفرؔ

زندگی تھی جو ترے وصل کا امکاں ہوتا

ان کی محفل میں ظفرؔ لوگ مجھے چاہتے ہیں

وہ جو کل کہتے تھے دیوانہ بھی سودائی بھی

زہر ہے میرے رگ و پے میں محبت شاید

اپنے ہی ڈنک سے بچھو کی طرح مر جاؤں

آ مرے چاند رات سونی ہے

بات بنتی نہیں ستاروں سے

پانی کو آگ کہہ کے مکر جانا چاہئے

پلکوں پہ اشک بن کے ٹھہر جانا چاہئے

ایک بھی آفتاب بن نہ سکا

لاکھ ٹوٹے ہوئے ستاروں سے

ہائے یہ طویل و سرد راتیں

اور ایک حیات مختصر میں

تھک کے پتھر کی طرح بیٹھا ہوں رستے میں ظفرؔ

جانے کب اٹھ سکوں کیا جانیے کب گھر جاؤں

ہے گلو گیر بہت رات کی پہنائی بھی

تیرا غم بھی ہے مجھے اور غم تنہائی بھی

آنکھوں میں ترے جلوے لیے پھرتے ہیں ہم لوگ

ہم لوگ کہ رسوا سر بازار ہوئے ہیں

باتوں سے سوا ہوتی ہے کچھ وحشت دل اور

احباب پریشاں ہیں مرے طرز عمل سے

دور ہو کر بھی سنیں تم نے حکایات وفا

قرب میں بھی وہی عنواں ہے قریب آ جاؤ