روانی میں نظر آتا ہے جو بھی

اسے تسلیم کر لیتے ہیں پانی

بیٹھے بیٹھے پھینک دیا ہے آتش دان میں کیا کیا کچھ

موسم اتنا سرد نہیں تھا جتنی آگ جلا لی ہے

واپس پلٹ رہے ہیں ازل کی تلاش میں

منسوخ آپ اپنا لکھا کر رہے ہیں ہم

یہ کس نے ہات پیشانی پہ رکھا

ہماری نیند پوری ہو گئی ہے

بیٹھے بیٹھے اسی غبار کے ساتھ

اب تو اڑنا بھی آ گیا ہے مجھے

یوں اٹھے اک دن کہ لوگوں کو ہوا

ابر کا دھوکا ہماری خاک پر

دشت و دریا کی ابتدا سے ہیں

ہم وہی تین دن کے پیاسے ہیں

عادلؔ سجے ہوئے ہیں سبھی خواب خوان پر

اور انتظار خلق خدا کر رہے ہیں ہم