kaisā ye marhala hai ki ik dūsre se ham

kahne ko āshnā haiñ magar āshnā nahīñ

kaisa ye marhala hai ki ek dusre se hum

kahne ko aashna hain magar aashna nahin

baḌī vīrānī hai dil ke shajar par

mohabbat ke parinde uḌ ga.e kyā

baDi virani hai dil ke shajar par

mohabbat ke parinde uD gae kya

kahāñ tak ham nibāheñ zindagī tere masā.ib se

kahāñ tak zeb detā hai kisī kā bā-vafā honā

kahan tak hum nibahen zindagi tere masaib se

kahan tak zeb deta hai kisi ka ba-wafa hona

muflisī paañv kī zanjīr thī aur

rū-ba-rū aa ke zarūrat Thahrī

muflisi panw ki zanjir thi aur

ru-ba-ru aa ke zarurat Thahri

nā-tavāñ shaḳhs hī paatā hai sazā.eñ aksar

go ḳhatāvār bhī hotā hai nahīñ bhī hotā

na-tawan shaKHs hi pata hai sazaen aksar

go KHatawar bhi hota hai nahin bhi hota