Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "javaan-o-piir-o-zanaan-e-qarya"

نظم کے متعلقہ نتیجہ "javaan-o-piir-o-zanaan-e-qarya"

نظم

نظر اٹھاؤ سفیر لیلیٰ برے تماشوں کا شہر دیکھو
یہ میرا قریہ یہ وحشتوں کا امین قریہ
تمہیں دکھاؤں
یہ صحن مسجد تھا یاں پہ آیت فروش بیٹھے دعائیں خلقت کو بیچتے تھے
یہاں عدالت تھی اور قاضی امان دیتے تھے رہزنوں کو
اور اس جگہ پر وہ خانقاہیں تھیں آب و آتش کی منڈیاں تھیں
جہاں پہ امرد پرست بیٹھے صفائے دل کی نمازیں پڑھ کر
خیال دنیا سے جاں ہٹاتے
سفیر لیلیٰ میں کیا بتاؤں کہ اب تو صدیاں گزر چکی ہیں
مگر سنو اے غریب سایہ کہ تم شریفوں کے راز داں ہو
یہی وہ دن تھے میں بھول جاؤں تو مجھ پہ لعنت
یہی وہ دن تھے سفیر لیلیٰ ہماری بستی میں چھ طرف سے فریب اترے
دروں سے آگے گھروں کے بیچوں پھر اس سے چولہوں کی ہانڈیوں میں
جوان و پیر و زنان قریہ خوشی سے رقصاں
تمام رقصاں
ہجوم طفلاں تھا یا تماشے تھے بوزنوں کے
کہ کوئی دیوار و در نہ چھوڑا
وہ ان پہ چڑھ کر شریف چہروں کی گردنوں کو پھلانگتے تھے
دراز قامت لحیم بونے
رضائے باہم سے کولھووں میں جتے ہوئے تھے
خراستے تھے وہ زرد غلہ تو اس کے پسنے سے خون بہتا تھا پتھروں سے
مگر نہ آنکھیں کہ دیکھ پائیں نہ ان کی ناکیں کہ سونگھتے وہ
فقط وہ بیلوں کی چکیاں تھیں سروں سے خالی
فریب کھاتے تھے خون پیتے تھے اور نیندیں تھیں بجوؤں کی
سفیر لیلیٰ یہ داستاں ہے اسی کھنڈر کی
اسی کھنڈر کے تماش بینوں فریب خوردوں کی داستاں ہے
مگر سنو اجنبی شناسا
کبھی نہ کہنا کہ میں نے قرنوں کے فاصلوں کو نہیں سمیٹا
فصیل قریہ کے سر پہ پھینکی گئی کمندیں نہیں اتاریں
تمہیں دکھاؤں تباہ بستی کے ایک جانب بلند ٹیلہ
بلند ٹیلے پہ بیٹھے بیٹھے ہونقوں سا
کبھی تو روتا تھا اپنی آنکھوں پہ ہاتھ رکھ کر کبھی مسلسل میں اونگھتا تھا
میں اونگھتا تھا کہ سانس لے لوں
مگر وہ چولہوں پہ ہانڈیوں میں فریب پکتے
سیاہ سانپوں کی ایسی کایا کلپ ہوئی تھی کہ میری آنکھوں پہ جم گئے تھے
سو یاں پہ بیٹھا میں آنے والے دھوئیں کی تلخی بتا رہا تھا
خبر کے آنسو بہا رہا تھا
مگر میں تنہا سفیر لیلیٰ
فقط خیالوں کی بادشاہی مری وراثت
تمام قریے کا ایک شاعر تمام قریے کا اک لعیں تھا
یہی سبب ہے سفیر لیلیٰ میں یاں سے نکلا تو کیسے گھٹنوں کے بل اٹھا تھا
نصیب ہجرت کو دیکھتا تھا
سفر کی سختی کو جانتا تھا
یہ سبز قریوں سے صدیوں پیچھے کی منزلوں کا سفر تھا مجھ کو
جو گرد صحرا میں لپٹے خاروں کی تیز نوکوں پہ جلد کرنا تھا اور
وہ ایسا سفر نہیں تھا جہاں پہ سائے کا رزق ہوتا
جہاں ہواؤں کا لمس ملتا
فرشتے آواز الااماں میں مرے لیے ہی
اجل کی رحمت کو مانگتے تھے
یہی وہ لمحے تھے جب شفق کے طویل ٹیلوں پہ چلتے چلتے
میں دل کے زخموں کو ساتھ لے کر
سفر کے پربت سے پار اترا

علی اکبر ناطق
نظم

بارہا دیکھا ہے تو نے آسماں کا انقلاب
کھول آنکھ اور دیکھ اب ہندوستاں کا انقلاب
مغرب و مشرق نظر آنے لگے زیر و زبر
انقلاب ہند ہے سارے جہاں کا انقلاب
کر رہا ہے قصر آزادی کی بنیاد استوار
فطرت طفل و زن و پیر و جواں کا انقلاب
صبر والے چھا رہے ہیں جبر کی اقلیم پر
ہو گیا فرسودہ شمشیر و سناں کا انقلاب

ظفر علی خاں
نظم

میں نے انٹرویو کیا کل ایک روزہ خور سے
میں زباں سے بولتا تھا وہ شکم کے زور سے
میں نے پوچھا آپ نے روزہ یہ کیوں رکھا نہیں
پیٹ دکھلانے لگا بولا کہ یوں رکھا نہیں
روزہ یوں رکھا نہیں چلتی نہیں باد صبا
موسم گرما میں روزے آئے ہیں اس مرتبہ
جاب کرنی ہے ضروری کام کرنا ہے مجھے
کوک پزّا کے سہارے شام کرنا ہے مجھے
میں نے لسی کے گلاسوں میں پیا کچھ اور ہے
دوپہر میں مرغ کھانے کا مزا کچھ اور ہے
دن میں کھانے کے لیے اقرار کر لیتا ہوں میں
شام کو مسجد میں بھی افطار کر لیتا ہوں میں
کوئی شے کھاتے ہوئے میں نے چھپائی ہی نہیں
آج تک میری ہوئی روزہ کشائی ہی نہیں
روزہ خوری پر مری دنیا کو حیرانی نہیں
روزہ یوں رکھا نہیں بجلی نہیں پانی نہیں
میں جو بے روزہ ہوں یہ بھی تاجروں کا ظرف ہے
سو روپے اجرت ہے میری سو روپے کا برف ہے
روح افزا کے بنا دنیا کی حوریں رہ گئیں
روزہ داروں کے لیے سوکھی کھجوریں رہ گئیں
روزہ یوں رکھا نہیں ہو جائے گا کھانا خراب
لنچ پر آئے گی کل ہوٹل میں رشک ماہتاب
میں ہوں شاعر مہرباں ہے مجھ پہ خلاق ازل
پیش کرنی ہے مجھے محفل میں اک تازہ غزل
اجر روزہ کیا ہے یہ شعروں میں بتلاؤں گا میں
لنچ میں افطار کی تشریح بن جاؤں گا میں
بھوک اور شاعر کا چوں کہ چولی دامن کا ہے ساتھ
مجھ سے بڑھ کے جانتا ہے کون روزہ کی صفات
پندرہ گھنٹے کا روزہ ہر جوان و پیر کا
شام کرنا صبح کا لانا ہے جوئے شیر کا

خالد عرفان
نظم

تیرے پیغام سے ہر پیر و جواں واقف ہے
ایک پنجاب ہی کیا سارا جہاں واقف ہے

معظم علی خاں
نظم

دے رہا ہے گالیاں بے نطق ہر پیر و جواں
واہ کیا کہنا تری تہذیب کا ہندوستاں

شاطرحکیمی
نظم

ہجر درویش نہیں
ہجر کم اندیش نہیں
ہجر نہیں پیر مغاں
ہجر عیار ہے
دنیا کا طلب گار ہے
اب تک ہے جواں

ثمینہ راجہ
نظم

یہ بنگالی حسیناؤں کی جلوہ گاہ ہے ہمدم
یہاں پیر و جواں آ کر متاع دل لٹاتے ہیں
جنوں انگیز لے میں نرم و شیریں گیت گاتے ہیں
نگاہوں میں نگاہیں ڈالتے ہیں مسکراتے ہیں

اویس احمد دوراں
نظم

پہلے زمانہ اور تھا مے اور تھی دور اور تھا
وہ بولیاں ہی اور تھیں وہ ٹولیاں ہی اور تھیں، وہ ہولیاں ہی اور تھیں
لیکن مرے پیر مغاں
کل تو نیا انداز تھا
اک دور کا تھا خاتمہ اک دور کا آغاز تھا
تیرے وفاداروں نے جب کھیلیں گلابی ہولیاں
نکلے بنا کر ٹولیاں
ہنستے چلے گاتے چلے
اپنے گلابی رنگ سے دنیا کو نہلاتے چلے
مسجد سے منہ موڑے ہوئے
مندر کا سنگ آستاں چھوڑے ہوئے
گرجا سے کترائے ہوئے
جیسے کہ ہوں روحانیت کی زندگانی ہی سے گھبرائے ہوئے
دور وفاداری کا یہ انجام تھا
فکر گنہ گاری کا تازہ دل ربا پیغام تھا
تیرے ہی کوچے میں یہ سب عہد وفا توڑے گئے
رشتے نئے جوڑے گئے
اور پھر گنہ گاروں نے کیا رندانہ ہنگامے کیے
اس وقت ان کو یاد تھا بس ایک ترسانا ترا
مفلسوں ناداروں کو للچانا ترا
جب میکدے کی گود میں
تیرے جفا تیری سزا کے نام پر ساغر چلے
سوکھے ہوئے کاسے لبالب بھر چلے
سب اپنے لب تر کر چلے
پھر توڑ دیں وہ پیالیاں جن میں سدا پی آئے تھے
شیشے چھنا چھن چھن چھنا چھن ٹوٹتے
اور رند لذت لوٹتے
ٹوٹے ہوئے شیشوں کا اک انبار تھا
شیشوں کے اس انبار میں اک وہ بھی کہنہ جام تھا
جس کو سکندر کے قوی ہیکل جواں
بھاگے تھے پورس کی زمیں کو چھوڑ کر
ان میں وہ کاسے بھی تو ہیں جن کو عرب لے آئے تھے
اپنی عبا سے ڈھانپ کر
پینے سے پہلے دیکھتے تھے محتسب کو جھانک کر
لیکن کبھی
پینے سے باز آتے نہ تھے فاتح جو تھے
ان میں ہیں ایسے جام بھی
جن پر پٹھانوں کے قوی ہاتھوں کے دھندلے سے نشاں
کچھ آج بھی موجود ہیں
اور ان نشانوں میں ہے خوں مفتوح ہندستان کا
اور ان میں ہیں وہ جام بھی جن کو مغل لے آئے تھے
تاتار سے قندھار سے کابل سے رکنا باد سے
مفتوح ہندستان میں
جن کو وہ اپنے قصر عالیشاں میں چھلکاتے رہے
تیغوں سے کھنکاتے رہے
اور وہ حسیں نازک سبک ہلکی صراحی کس کی ہے
پیرس کے مے خانوں میں یہ مشہور تھی
لایا تھا اک تاجر اسے جو بعد میں فاتح بنا
یہ ہلکے شیشوں کے گلاس اور یہ نئے ہلکے سے پیگ
جن پر لکھا ہے یہ بنے تھے ملک انگلستان میں
اور حال کی صدیوں میں چلتے رہے
پینے کو مل جاتی تھی پی لیتے تھے ہم
لیکن تہی دستی کا یہ عالم تھا دل جلتے رہے
ہم آج گھبرا ہی گئے
اور ان سبھی شیشوں کو چکناچور کر ڈالا وفور جوش میں
چھن چھن چھنا چھن توڑ کر
جیسے کہ بربادی کی دیوی چھم چھما چھم ناچتی
ہولی منانے کے لیے مے خانے میں آ ہی گئے
ٹوٹے ہوئے شیشوں کے اس انبار پر
ہم نے جلائی آگ یوں
زردشت کا پاکیزہ دل سچائیوں پر ہنس دیا
جیسے کہ یہ کہنے لگا
جلنے دو جلنے دو یوں ہی شیشے پگھلنے دو یوں ہی
تیرے وفاداروں نے یوں پیر مغاں
شب بھر جلائیں ہولیاں
نعرے وہ مستانے لگے اس جوش میں
دل گر پڑے احساس کی آغوش میں
اور بول اٹھے تسلیم اے پیر مغاں جاتے ہیں ہم
کل پھر پلٹ کر آئیں گے
اس وقت اس مے خانے میں سامان ہوں گے دوسرے
تیرے پرانے ذہن کے معیار توڑے جائیں گے
تعمیر نو کی جائے گی
لیکن ہمارے سال خوردہ مہرباں پیر مغاں
تجھ کو برا لگتا ہے کیوں
غیروں کا کیا تیرا بھی کیا
یہ مے کدہ ہم سب کا ہے پنچایتی
تو کیا ہے تیرا خوف کیا
کہہ تو دیا پیر مغاں کل پلٹ کر آئیں گے
ہرگز نہ ہم باز آئیں گے
کس کو ڈراتا ہے کہ تم اس کی سزا پا جاؤ گے
گاتے تھے ہم گاتے ہیں ہم گائیں گے ہم
ہرگز نہ باز آئیں گے ہم
جھیلیں گے جیتے جائیں گے
پیروں میں ہے زنجیر لیکن ٹوٹ بھی سکتی ہے یہ
ہاں آج ہستی قید ہے کل چھوٹ بھی سکتی ہے یہ
گانے دے گانے دے ہمیں
دھومیں مچانے دے ہمیں
شیشے کو شیشے سے لڑانے دے ہمیں
چھن چھن چھنا چھن کی صدا
بڑھنے دے بڑھنے دے ابھی
ہم مست و بے خود ناچتے گاتے جلاتے توڑتے
ہنستے رہیں چلتے رہیں
اور تو بھی خود پیر مغاں
ہولی کے نغمے سن ذرا اور دیکھ اپنی آنکھ سے
تیرے وفاداروں نے کیا کھیلیں گلابی ہولیاں
منہ مے کدے سے موڑ کر ہولی کی یہ ٹولی چلی
گل زار میں
سبزے لچکتی ڈالیاں گنجان، سندر جھاڑیاں
پانی کی سینچی کیاریاں، کانٹوں میں چبھتی پتیاں
یہ سب سہی لیکن یہاں وہ شے کہاں
جس کے لیے مشہور ہے انگور ناب
ہاں کیا کہا پیر مغاں
تلووں کے نیچے پھول ہیں ان میں سے دو اک چن بھی لوں
خالی ہیں گلدستے ترے
تجھ کو نہیں معلوم ابھی
خالی یہ گلدستے ترے خالی ہی رہ جائیں گے اب
پھولوں نے ٹھانی ہے کہ شاخوں ہی پہ مر جائیں گے اب
اور تیرے کمروں میں وہ نہ آئیں گے اب
منہ بند کلیاں اب کہاں
جو اپنی سندر موہنی مسکان کر دیں رائیگاں
اور اپنا گلشن چھوڑ دیں سینے میں خوشبوئیں لیے
اور اجنبی ماحول میں
طاق نظر کی کانپتی زینت بنیں
کلیوں کے منہ اب کھل چکے منہ بند کلیاں اب کہاں
کلیاں کہاں یہ پھول ہیں
خاک چمن کی گود میں آرام جاں یہ پھول ہیں
آتش زباں یہ پھول ہیں
اور دیکھ تو یہ پھول کتنے شوخ ہیں
جو ٹوٹ کر شاخوں سے گر جاتے ہیں تیری راہ میں
اے دلکش پیر مغاں
یہ چاہتے ہیں روک دیں گل زار میں راہیں تری
تیرے لیے چارہ ہی کیا اب رہ گیا
ان بے حیا پھولوں کی آنکھوں کا تو پانی بہہ گیا
اب ہیں یہ ان کی جرأتیں روکیں گے تیرے راستے
تو بھی خدا کے واسطے
ان کو کچل دے پیس دے
ورنہ خدا نخواستہ
یہ روک ہی لیں راستہ
کلیاں نہیں کانٹے ہیں یہ
کانٹوں سے بھی بد تر ہیں یہ نشتر ہیں یہ خنجر ہیں یہ
گل زار میں تیرے قدم کچھ آج تو آئے نہیں
تو نے انہیں سبزوں پہ کی ہے مے کشی
صدیوں سے تیرا دور ہے
گل زار پر ہے حق ترا
تو ڈر گیا پیر مغاں
کتنا بھیانک خواب تھا
تعبیر کچھ بھی ہو مگر
تیرے وفاداروں نے کل
کس آن سے کس بان سے کس شان سے
کھیلیں گلابی ہولیاں

علی جواد زیدی
نظم

کس کو لے کر جا رہے ہیں آج یوں نوحہ کناں
رو رہے ہیں آج کس کو ملک کے پیر و جواں
سرنگوں کس کے لئے ہے ہند کا قومی نشاں
نعش سے لپٹا ہے کس کی پرچم ہندوستاں

پریم لال شفا دہلوی
نظم

مگر اک مخمصے میں مادر ہندوستاں ہے آج
اسے درکار اہل ہند کا عزم جواں ہے آج
مٹانا دشمنوں کا دہر سے نام و نشاں ہے آج
کمر باندھے ہوئے بھارت کا ہر پیر و جواں ہے آج

سدرشن کمار وگل
نظم

صدا ظلم کی آ رہی ہے جہاں سے
کہ ظاہر ہیں بیداد پیر و جواں سے
ٹپکتی ہیں گر حسرتیں اب یہاں سے
لپکتے ہیں شعلے ستم کے وہاں سے
مگر تم ہو اس پہ بھی محو قناعت
قناعت نہیں یہ ہے ضعف و کسالت

آفتاب رئیس پانی پتی
نظم

سفیر لیلیٰ یہی کھنڈر ہیں جہاں سے آغاز داستاں ہے
ذرا سا بیٹھو تو میں سناؤں
فصیل قریہ کے سرخ پتھر اور ان پہ اژدر نشان برجیں گواہ قریہ کی عظمتوں کی
چہار جانب نخیل طوبیٰ اور اس میں بہتے فراواں چشمے
بلند پیڑوں کے ٹھنڈے سائے تھے شاخ زیتوں اسی جگہ تھی
یہی ستوں تھے جو دیکھتے ہو پڑے ہیں مردہ گدھوں کے مانند
اٹھائے رکھتے تھے ان کے شانے عظیم قصروں کی سنگیں سقفیں
یہی وہ در ہیں سفیر لیلیٰ کہ جن کے تختے اڑا لیے ہیں دنوں کی آوارہ صرصروں نے
یہیں سے گزری تھیں سرخ اونٹوں کی وہ قطاریں
کہ ان کی پشتیں صنوبروں کے سفید پالان لے کے چلتیں
اٹھائے پھرتیں جوان پریوں کی محملوں کو
یہ صحن قریہ ہے ان جگہوں پر گھنی کجھوروں کی سبز شاخیں
فلک سے تازہ پھلوں کے خوشے چرا کے بھرتی تھیں پہلوؤں میں
سفید پانی کے سو کنویں یوں بھرے ہوئے تھے
کہ چوڑی مشکوں کو ہاتھ بھر کی ہی رسیاں تھیں
مضاف قریہ میں سبزہ گاہیں اور ان میں چرتی تھیں فربہ بھیڑیں
شمال قریہ میں نیل گائیں منار مسجد سے دیکھتے تھے
پرے ہزاروں کبوتروں کے فصیل قریہ سے گنبدوں تک
پروں کو زوروں سے پھڑپھڑاتے تھے اور صحنوں میں دوڑتے تھے
یہیں تھا سب کچھ سفیر لیلیٰ
اسی جگہ پر جہاں ببولوں کے خار پھرتے ہیں چوہیوں کی سواریوں پر
جہاں پرندوں کو ہول آتے ہیں راکھ اڑتی ہے ہڈیوں کی
یہی وہ وحشت سرا ہے جس میں دلوں کی آنکھیں لرز رہی ہیں
سفیر لیلیٰ تم آج آئے ہو تو بتاؤں
ترے مسافر یہاں سے نکلے افق کے پربت سے اس طرف کو
وہ ایسے نکلے کہ پھر نہ آئے
ہزار کہنہ دعائیں گرچہ بزرگ ہونٹوں سے اٹھ کے بام فلک پہ پہنچیں
مگر نہ آئے
اور اب یہاں پر نہ کوئی موسم نہ بادلوں کے شفیق سائے
نہ سورجوں کی سفید دھوپیں
فقط سزائیں ہیں اونگھ بھرتی کریہہ چہروں کی دیویاں ہیں
سفیر لیلیٰ
یہاں جو دن ہیں وہ دن نہیں ہیں
یہاں کی راتیں ہیں بے ستارہ
سحر میں کوئی نمی نہیں ہے

علی اکبر ناطق
نظم

اس کارواں میں طفل بھی ہیں نوجواں بھی ہیں
بوڑھے بھی ہیں مریض بھی ہیں ناتواں بھی ہیں
میلے پھٹے لباس میں کچھ دیویاں بھی ہیں
سب زندگی سے تنگ بھی ہیں سرگراں بھی ہیں
بے زار زندگی سے ہیں پیر و جواں سبھی
الطاف شہر یار کے ہیں نوحہ خواں سبھی

اسرار الحق مجاز
نظم

سونا سونا سا ہے کیوں آج جہان اردو
اٹھ گیا کہتے ہیں اک پیر مغان‌ اردو

مسعود حسین خاں
نظم

نغمہ در جاں رقص برپا خندہ بر لب
دل تمناؤں کے بے پایاں الاؤ کے قریب
دل مرے صحرا نورد پیر دل
ریگ کے دل شاد شہری ریگ تو
اور ریگ ہی تیری طلب
ریگ کی نکہت ترے پیکر میں تیری جاں میں ہے
ریگ صبح عید کے مانند زرتاب و جلیل
ریگ صدیوں کا جمال
جشن آدم پر بچھڑ کر ملنے والوں کا وصال
شوق کے لمحات کے مانند آزاد و عظیم
ریگ نغمہ زن
کہ ذرے ریگ زاروں کی وہ پازیب قدیم
جس پہ پڑ سکتا نہیں دست لئیم
ریگ صحرا زرگری کی ایک کی لہروں سے دور
چشمۂ مکر و ریا شہروں سے دور
ریگ شب بیدار ہے سنتی ہے ہر جابر کی چاپ
ریگ شب بیدار ہے نگراں ہے مانند نقیب
دیکھتی ہے سایۂ آمر کی چاپ
ریگ ہر عیار غارت گر کی موت
ریگ استبداد کے طغیاں کے شور و شر کی موت
ریگ جب اٹھتی ہے اڑ جاتی ہے ہر فاتح کی نیند
ریگ کے نیزوں سے زخمی سب شہنشاہوں کے خواب
ریگ اے صحرا کی ریگ
مجھ کو اپنے جاگتے ذروں کے خوابوں کی
نئی تعبیر دے
ریگ کے ذروں ابھرتی صبح تم
آؤ صحرا کی حدوں تک آ گیا روز طرب
دل مرے صحرا نورد پیر دل
آ چوم ریگ
ہے خیالوں کے پری زادوں سے بھی معصوم ریگ
ریگ رقصاں ماہ و سال نور تک رقصاں رہے
اس کا ابریشم ملائم نرم خو خنداں رہے
دل مرے صحرا نورد پیر دل
یہ تمناؤں کا بے پایاں الاؤ
راہ گم کر دوں کی مشعل اس کے لب پر آؤ آؤ
تیرے ماضی کے خذف ریزوں سے جاگی ہے یہ آگ
آگ کی قرمز زباں پر انبساط نو کے راگ
دل مرے صحرا نورد پیر دل
سرگرانی کی شب رفتہ سے جاگ
کچھ شرر آغوش صرصر میں ہیں گم
اور کچھ زینہ بہ زینہ شعلوں کے مینار پر چڑھتے ہوئے
اور کچھ تہہ میں الاؤ کی ابھی
مضطرب لیکن مذبذب طفل کمسن کی طرح
آگ زینہ آگ رنگوں کا خزینہ
آگ ان لذات کا سر چشمہ ہے
جس سے لیتا ہے غذا عشاق کے دل کا تپاک
چوب خشک انگور اس کی مے ہے آگ
سرسراتی ہے رگوں میں عید کے دن کی طرح
آگ کاہن یاد سے اتری ہوئی صدیوں کی یہ افسانہ خواں
آنے والے قرنہا کی داستانیں لب پہ ہیں
دل مرا صحرا نورد پیر دل سن کر جواں
آگ آزادی کا دل شادی کا نام
آگ پیدائش کا افزائش کا نام
آگ کے پھولوں میں نسریں یاسمن سنبل شفیق و نسترن
آگ آرائش کا زیبائش کا نام
آگ وہ تقدیس دھل جاتے ہیں جس سے سب گناہ
آگ انسانوں کی پہلی سانس کے مانند اک ایسا کرم
عمر کا اک طول بھی جس کا نہیں کافی جواب
یہ تمناؤں کا بے پایاں الاؤ گر نہ ہو
اس لق و دق میں نکل آئیں کہیں سے بھیڑیے
اس الاؤ کو سدا روشن رکھو
ریگ صحرا کو بشارت ہو کہ زندہ ہے الاؤ
بھیڑیوں کی چاپ تک آتی نہیں
آگ سے صحرا کا رشتہ ہے قدیم
آگ سے صحرا کے ٹیڑھے رینگنے والے
گرہ آلود ژولیدہ درخت
جاگتے ہیں نغمہ در جاں رقص برپا خندہ بر لب
اور منا لیتے ہیں تنہائی میں جشن ماہتاب
ان کی شاخیں غیر مرئی طبل کی آواز پر دیتی ہیں تال
بیخ و بن سے آنے لگتی ہے خداوندی جلاجل کی صدا
آگ سے صحرا کا رشتہ ہے قدیم
رہروؤں صحرا نوردوں کے لیے ہے رہنما
کاروانوں کا سہارا بھی ہے آگ
اور صحراؤں کی تنہائی کو کم کرتی ہے آگ
آگ کے چاروں طرف پشمینہ و دستار میں لپٹے ہوئے
افسانہ گو
جیسے گرد چشم مژگاں کا ہجوم
ان کے حیرت ناک دل کش تجربوں سے
جب دمک اٹھتی ہے ریت
ذرہ ذرہ بجنے لگتا ہے مثال ساز جاں
گوش بر آواز رہتے ہیں درخت
اور ہنس دیتے ہیں اپنی عارفانہ بے نیازی سے کبھی
یہ تمناؤں کا بے پایاں الاؤ گر نہ ہو
ریگ اپنی خلوت بے نور و خودبیں میں رہے
اپنی یکتائی کی تحسیں میں رہے
اس الاؤ کو سدا روشن رکھو
یہ تمناؤں کا بے پایاں الاؤ گر نہ ہو
ایشیا افریقہ پہنائی کا نام
بے کار پہنائی کا نام
یورپ اور امریکہ دارائی کا نام
تکرار دارائی کا نام
میرا دل صحرا نورد پیر دل
جاگ اٹھا ہے مشرق و مغرب کی ایسی یک دلی
کے کاروانوں کا نیا رویا لیے
یک دلی ایسی کہ ہوگی فہم انساں سے ورا
یک دلی ایسی کہ ہم سب کہہ اٹھیں
اس قدر عجلت نہ کر
اژدہام گل نہ بن
کہہ اٹھیں ہم
تو غم کل تو نہ تھی
اب لذت کل بھی نہ بن
روز آسائش کی بے دردی نہ بن
یک دلی بن ایسا سناٹا نہ بن
جس میں تابستاں کی دوپہروں کی
بے حاصل کسالت کے سوا کچھ بھی نہ ہو
اس جفا گر یک دلی کے کارواں یوں آئیں گے
دست جادو گر سے جیسے پھوٹ نکلے ہوں طلسم
عشق حاصل خیز سے یا زور پیدائی سے جیسے ناگہاں
کھل گئے ہوں مشرق و مغرب کے جسم
جسم صدیوں کے عقیم
کارواں فرخندہ پے اور ان کا بار
کیسہ کیسہ تخت جم اور تاج کے
کوزہ کوزہ فرد کی سطوت کی مے
جامہ جامہ روز و شب محنت کا خے
نغمہ نغمہ حریت کی گرم لے
سالکو فیروز بختو آنے والے قافلو
شہر سے لوٹو گے تم تو پاؤ گے
ریت کے سرحد پہ جو روح ابد خوابیدہ تھی
جاگ اٹھی ہے شکوہ ہائے نے سے وہ
ریت کی تہہ میں جو شرمیلی سحر روئیدہ تھی
جاگ اٹھی ہے حریت کی لے سے وہ
اتنی دوشیزہ تھی اتنی مرد نا دیدہ تھی صبح
پوچھ سکتے تھے نہ اس کی عمر ہم
درد سے ہنستی نہ تھی
ذروں کی رعنائی پہ بھی ہنستی نہ تھی
ایک محجوبانہ بے خبری میں ہنس دیتی تھی صبح
اب مناتی ہے وہ صحرا کا جلال
جیسے عز و جل کے پاؤں کی یہی محراب ہو
زیر محراب آ گئی ہو اس کو بے داری کی رات
خود جناب عز و جل سے جیسے امید زفاف
سارے ناکردہ گناہ اس کے معاف
صبح صحرا شادباد
اے عروس عز و جل فرخندہ رو تابندہ کھو
تو اک ایسے حجرۂ شب سے نکل کر آئی ہے
دست قاتل نے بہایا تھا جہاں ہر سیج پر
سینکڑوں تاروں کا رخشندہ لہو پھولوں کے پاس
صبح صحرا سر مرے زانو پہ رکھ کر داستاں
ان تمنا کے شہیدوں کی نہ کہہ
ان کی نیمہ رس امنگوں آرزوؤں کی نہ کہہ
جن سے ملنے کا کوئی امکاں نہیں
شہد تیرا جن کو نش جاں نہیں
آج بھی کچھ دور اس صحرا کے پار
دیو کی دیوار کے نیچے نسیم
روز و شب چلتی ہے مبہم خوف سے سہمی ہوئی
جس طرح شہروں کی راہوں پر یتیم
نغمہ بر لب تاکہ ان کی جاں کا سناٹا ہو دور
آج بھی اس ریگ کے ذروں میں ہیں
ایسے ذرے آپ ہی اپنے غنیم
آج بھی اس آگ کے شعلوں میں ہیں
وہ شرر جو اس کی تہہ میں پر بریدہ رہ گئے
مثل حرف ناشنیدہ رہ گئے
صبح صحرا اے عروس عز و جل
آ کہ ان کی داستاں دہرائیں ہم
ان کی عزت ان کی عظمت گائیں ہم
صبح ریت اور آگ ہم سب کا جلال
یک دلی کے کارواں ان کا جمال
آؤ
اس تحلیل کے حلقے میں ہم مل جائیں
آؤ
شاد باغ اپنی تمناؤں کا بے پایاں الاؤ

ن م راشد
نظم

رونق مکتب بتاؤ تو ذرا
چار حرفی لفظ ہے وہ کون سا
سر کو اس کے کاٹ ڈالیں ہم اگر
ظلم کے معنی ہے دیتا سربسر
تیسرا گر حرف اس کا دیں گرا
اس کے معنی ہوں طریقہ قاعدہ
مانتے ہیں اس کو سب پیر و جواں
زور و طاقت میں ہے وہ اک پہلواں
دیکھ لو تم آپ میں نے کہہ دیا
چار شعروں کے ہے سر ہی میں چھپا

ضیا فتیح آبادی
نظم

ابو لہب اجنبی زمینوں کے لعل و گوہر سمیٹ کر
پھر وطن کو لوٹا ہزار طرار و تیز آنکھیں پرانے
غرفوں سے جھانک اٹھیں ہجوم پیر و جواں کا
گہرا ہجوم اپنے گھروں سے نکلا ابو لہب کے جلوس
کو دیکھنے کو لپکا
ابو لہب اک شب زفاف ابو لہب کا جلا
پھپھولا خیال کی ریت کا بگولا وہ عشق برباد
کا ہیولی ہجوم میں سے پکار اٹھی ابو لہب

ن م راشد
نظم

پیر جوش شباب کیا جانے
شورش اضطراب کیا جانے
سینۂ انقلاب چھلنی ہے
شاعر انقلاب کیا جانے

اسرار الحق مجاز
نظم

ہلال عید بنا ہے کلید عیش و نشاط
جہاں میں بچھ گئی پھر سے مسرتوں کی بساط
خوشی سے پھولے سماتے نہیں ہیں مرد و زن
مہک اٹھے در و دیوار اور صحن چمن
گلی میں کوچوں میں راہوں میں شاہراہوں میں
مسرتوں کے نظارے ہیں خانقاہوں میں
اندھیرے منہ ہی پرندے بھی چہچہانے لگے
قدم قدم پہ لگے میلے شادیانے بجے
ہے کیف و مستی کے عالم میں آج پیر و جواں
عبادتوں کا نشہ دے گیا مہ رمضاں
خدا کے دین کا کس طرح ہو بیان حضور
خدا ہر اک کو خوشی عید کی نصیب کرے
ہماری نسل کو اس دین سے قریب کرے

امین حزیں
نظم

سلسلۂ روز و شب نقش گر حادثات
سلسلۂ روز و شب اصل حیات و ممات
سلسلۂ روز و شب تار حریر دو رنگ
جس سے بناتی ہے ذات اپنی قبائے صفات
سلسلۂ روز و شب ساز ازل کی فغاں
جس سے دکھاتی ہے ذات زیر و بم ممکنات
تجھ کو پرکھتا ہے یہ مجھ کو پرکھتا ہے یہ
سلسلۂ روز و شب صیرفی کائنات
تو ہو اگر کم عیار میں ہوں اگر کم عیار
موت ہے تیری برات موت ہے میری برات
تیرے شب و روز کی اور حقیقت ہے کیا
ایک زمانے کی رو جس میں نہ دن ہے نہ رات
آنی و فانی تمام معجزہ ہائے ہنر
کار جہاں بے ثبات کار جہاں بے ثبات
اول و آخر فنا باطن و ظاہر فنا
نقش کہن ہو کہ نو منزل آخر فنا
ہے مگر اس نقش میں رنگ ثبات دوام
جس کو کیا ہو کسی مرد خدا نے تمام
مرد خدا کا عمل عشق سے صاحب فروغ
عشق ہے اصل حیات موت ہے اس پر حرام
تند و سبک سیر ہے گرچہ زمانے کی رو
عشق خود اک سیل ہے سیل کو لیتا ہے تھام
عشق کی تقویم میں عصر رواں کے سوا
اور زمانے بھی ہیں جن کا نہیں کوئی نام
عشق دم جبرئیل عشق دل مصطفی
عشق خدا کا رسول عشق خدا کا کلام
عشق کی مستی سے ہے پیکر گل تابناک
عشق ہے صہبائے خام عشق ہے کاس الکرام
عشق فقیہہ حرام عشق امیر جنود
عشق ہے ابن السبیل اس کے ہزاروں مقام
عشق کے مضراب سے نغمۂ تار حیات
عشق سے نور حیات عشق سے نار حیات
اے حرم قرطبہ عشق سے تیرا وجود
عشق سراپا دوام جس میں نہیں رفت و بود
رنگ ہو یا خشت و سنگ چنگ ہو یا حرف و صوت
معجزۂ فن کی ہے خون جگر سے نمود
قطرۂ خون جگر سل کو بناتا ہے دل
خون جگر سے صدا سوز و سرور و سرود
تیری فضا دل فروز میری نوا سینہ سوز
تجھ سے دلوں کا حضور مجھ سے دلوں کی کشود
عرش معلی سے کم سینۂ آدم نہیں
گرچہ کف خاک کی حد ہے سپہر کبود
پیکر نوری کو ہے سجدہ میسر تو کیا
اس کو میسر نہیں سوز و گداز سجود
کافر ہندی ہوں میں دیکھ مرا ذوق و شوق
دل میں صلوٰۃ و درود لب پہ صلوٰۃ و درود
شوق مری لے میں ہے شوق مری نے میں ہے
نغمۂ اللہ ہو میرے رگ و پے میں ہے
تیرا جلال و جمال مرد خدا کی دلیل
وہ بھی جلیل و جمیل تو بھی جلیل و جمیل
تیری بنا پائیدار تیرے ستوں بے شمار
شام کے صحرا میں ہو جیسے ہجوم نخیل
تیرے در و بام پر وادی ایمن کا نور
تیرا منار بلند جلوہ گہ جبرئیل
مٹ نہیں سکتا کبھی مرد مسلماں کہ ہے
اس کی اذانوں سے فاش سر کلیم و خلیل
اس کی زمیں بے حدود اس کا افق بے ثغور
اس کے سمندر کی موج دجلہ و دنیوب و نیل
اس کے زمانے عجیب اس کے فسانے غریب
عہد کہن کو دیا اس نے پیام رحیل
ساقی ارباب ذوق فارس میدان شوق
بادہ ہے اس کا رحیق تیغ ہے اس کی اصیل
مرد سپاہی ہے وہ اس کی زرہ لا الہ
سایۂ شمشیر میں اس کی پنہ لا الہ
تجھ سے ہوا آشکار بندۂ مومن کا راز
اس کے دنوں کی تپش اس کی شبوں کا گداز
اس کا مقام بلند اس کا خیال عظیم
اس کا سرور اس کا شوق اس کا نیاز اس کا ناز
ہاتھ ہے اللہ کا بندۂ مومن کا ہاتھ
غالب و کار آفریں کار کشا کارساز
خاکی و نوری نہاد بندۂ مولا صفات
ہر دو جہاں سے غنی اس کا دل بے نیاز
اس کی امیدیں قلیل اس کے مقاصد جلیل
اس کی ادا دل فریب اس کی نگہ دل نواز
آج بھی اس دیس میں عام ہے چشم غزال
اور نگاہوں کے تیر آج بھی ہیں دل نشیں
بوئے یمن آج بھی اس کی ہواؤں میں ہے
رنگ حجاز آج بھی اس کی نواؤں میں ہے
دیدۂ انجم میں ہے تیری زمیں آسماں
آہ کہ صدیوں سے ہے تیری فضا بے اذاں
کون سی وادی میں ہے کون سی منزل میں ہے
عشق بلا خیز کا قافلۂ سخت جاں
دیکھ چکا المنی شورش اصلاح دیں
جس نے نہ چھوڑے کہیں نقش کہن کے نشاں
حرف غلط بن گئی عصمت پیر کنشت
اور ہوئی فکر کی کشتئ نازک رواں
چشم فرانسیس بھی دیکھ چکی انقلاب
جس سے دگر گوں ہوا مغربیوں کا جہاں
ملت رومی نژاد کہنہ پرستی سے پیر
لذت تجدیدہ سے وہ بھی ہوئی پھر جواں
روح مسلماں میں ہے آج وہی اضطراب
راز خدائی ہے یہ کہہ نہیں سکتی زباں
نرم دم گفتگو گرم دم جستجو
رزم ہو یا بزم ہو پاک دل و پاک باز
نقطۂ پرکار حق مرد خدا کا یقیں
اور یہ عالم تمام وہم و طلسم و مجاز
عقل کی منزل ہے وہ عشق کا حاصل ہے وہ
حلقۂ آفاق میں گرمئ محفل ہے وہ
کعبۂ ارباب فن سطوت دین مبیں
تجھ سے حرم مرتبت اندلسیوں کی زمیں
ہے تہ گردوں اگر حسن میں تیری نظیر
قلب مسلماں میں ہے اور نہیں ہے کہیں
آہ وہ مردان حق وہ عربی شہسوار
حامل خلق عظیم صاحب صدق و یقیں
جن کی حکومت سے ہے فاش یہ رمز غریب
سلطنت اہل دل فقر ہے شاہی نہیں
جن کی نگاہوں نے کی تربیت شرق و غرب
ظلمت یورپ میں تھی جن کی خرد راہ بیں
جن کے لہو کے طفیل آج بھی ہیں اندلسی
خوش دل و گرم اختلاط سادہ و روشن جبیں
دیکھیے اس بحر کی تہہ سے اچھلتا ہے کیا
گنبد نیلوفری رنگ بدلتا ہے کیا
وادی کہسار میں غرق شفق ہے سحاب
لعل بدخشاں کے ڈھیر چھوڑ گیا آفتاب
سادہ و پرسوز ہے دختر دہقاں کا گیت
کشتئ دل کے لیے سیل ہے عہد شباب
آب روان کبیر تیرے کنارے کوئی
دیکھ رہا ہے کسی اور زمانے کا خواب
عالم نو ہے ابھی پردۂ تقدیر میں
میری نگاہوں میں ہے اس کی سحر بے حجاب
پردہ اٹھا دوں اگر چہرۂ افکار سے
لا نہ سکے گا فرنگ میری نواؤں کی تاب
جس میں نہ ہو انقلاب موت ہے وہ زندگی
روح امم کی حیات کشمکش انقلاب
صورت شمشیر ہے دست قضا میں وہ قوم
کرتی ہے جو ہر زماں اپنے عمل کا حساب
نقش ہیں سب ناتمام خون جگر کے بغیر
نغمہ ہے سودائے خام خون جگر کے بغیر

علامہ اقبال
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے