ذرائع آمد و رفت پر اشعار

رات تھی جب تمہارا شہر آیا

پھر بھی کھڑکی تو میں نے کھول ہی لی

صبح کاذب کی ہوا میں درد تھا کتنا منیرؔ

ریل کی سیٹی بجی تو دل لہو سے بھر گیا

کرنا ہے سفر مجھ کو اسی بس سے لٹک کر

جس شہر بھی جائے مری تقدیر بھٹک کر

واپسی پر دوسری بس میں اسے دیکھا گیا

ساتھ والی سیٹ پر تھا وہ مری جاتے ہوئے

سواری صرف اک اتری ہے اور میں

بھری گاڑی میں تنہا رہ گیا ہوں

دوستی کی چلتی گاڑی سے اتر جاتے ہیں لوگ

اور اپنا منہ بھی آگے کی طرف رکھتے نہیں

بس کا سفر تھا زندگی جس میں شریک تو بھی تھا

جانے کب آنکھ لگ گئی جانے تو کب اتر گیا

چاہے اپنے گھر کا ہی گیرج ہو

گاڑی اپنی لاک ہونی چاہیے

رات ڈھلنے کو ہے اور آخری گاڑی والا

مجھ سے کہتا ہے کہ تجھ کو بھی کہیں جانا ہے

آپ کا اس سے واسطہ کھڑکی سے دیکھنے کا ہے

مجھ کو تو دیجے راستہ میرا تو شہر آ گیا

تمہارے شہر کو جاتے یہ لاریوں والے

صدا لگاتے نہیں مجھ پہ طنز کرتے ہیں

ریل کے زور و شور سے سارا مکاں لرز گیا

اوس الگ نہ ہو سکی کھلتے ہوئے گلاب سے

اچھا بھلا رواں تھا تری یاد کی طرف

پھر یوں ہوا کہ ریل کا کانٹا بدل گیا

ساتھ والی نشست خالی ہوئی

راستے میں اتر گیا مرا دل