Mera darwaza hawaaon ne hilaya hoga: Kaif Bhopali

zindagī shāyad isī kā naam hai

dūriyāñ majbūriyāñ tanhā.iyāñ

zindagi shayad isi ka nam hai

duriyan majburiyan tanhaiyan

tujhe kaun jāntā thā mirī dostī se pahle

tirā husn kuchh nahīñ thā mirī shā.irī se pahle

tujhe kaun jaanta tha meri dosti se pahle

tera husn kuchh nahin tha meri shairi se pahle

kaun aa.egā yahāñ koī na aayā hogā

merā darvāza havāoñ ne hilāyā hogā

kaun aaega yahan koi na aaya hoga

mera darwaza hawaon ne hilaya hoga

aag kā kyā hai pal do pal meñ lagtī hai

bujhte bujhte ek zamānā lagtā hai

aag ka kya hai pal do pal mein lagti hai

bujhte bujhte ek zamana lagta hai

saaya hai kam khajūr ke ūñche daraḳht kā

ummīd bāñdhiye na baḌe aadmī ke saath

saya hai kam khajur ke unche daraKHt ka

ummid bandhiye na baDe aadmi ke sath

maañ kī āġhosh meñ kal maut kī āġhosh meñ aaj

ham ko duniyā meñ ye do vaqt suhāne se mile

man ki aaghosh mein kal maut ki aaghosh mein aaj

hum ko duniya mein ye do waqt suhane se mile

ik nayā zaḳhm milā ek na.ī umr milī

jab kisī shahr meñ kuchh yaar purāne se mile

ek naya zaKHm mila ek nai umr mili

jab kisi shahr mein kuchh yar purane se mile

idhar aa raqīb mere maiñ tujhe gale lagā luuñ

mirā ishq be-mazā thā tirī dushmanī se pahle

idhar aa raqib mere main tujhe gale laga lun

mera ishq be-maza tha teri dushmani se pahle

gul se lipTī huī titlī ko girā kar dekho

āñdhiyo tum ne daraḳhtoñ ko girāyā hogā

gul se lipTi hui titli ko gira kar dekho

aandhiyo tum ne daraKHton ko giraya hoga

'kaif' pardes meñ mat yaad karo apnā makāñ

ab ke bārish ne use toḌ girāyā hogā

'kaif' pardes mein mat yaad karo apna makan

ab ke barish ne use toD giraya hoga

janāb-e-'kaif' ye dillī hai 'mīr' o 'ġhālib' kī

yahāñ kisī kī taraf-dāriyāñ nahīñ chaltīñ

janab-e-'kaif' ye dilli hai 'mir' o 'ghaalib' ki

yahan kisi ki taraf-dariyan nahin chaltin

kuchh mohabbat ko na thā chain se rakhnā manzūr

aur kuchh un kī ināyāt ne jiine na diyā

kuchh mohabbat ko na tha chain se rakhna manzur

aur kuchh un ki inayat ne jine na diya

dar-o-dīvār pe shakleñ sī banāne aa.ī

phir ye bārish mirī tanhā.ī churāne aa.ī

dar-o-diwar pe shaklen si banane aai

phir ye barish meri tanhai churane aai

jis din mirī jabīñ kisī dahlīz par jhuke

us din ḳhudā shigāf mire sar meñ Daal de

jis din meri jabin kisi dahliz par jhuke

us din KHuda shigaf mere sar mein Dal de

vo din bhī haa.e kyā din the jab apnā bhī ta.alluq thā

dashahre se divālī se basantoñ se bahāroñ se

wo din bhi hae kya din the jab apna bhi talluq tha

dashahre se diwali se basanton se bahaaron se

chāhtā huuñ phūñk duuñ is shahr ko

shahr meñ in kā bhī ghar hai kyā karūñ

chahta hun phunk dun is shahr ko

shahr mein in ka bhi ghar hai kya karun

mat dekh ki phirtā huuñ tire hijr meñ zinda

ye pūchh ki jiine meñ maza hai ki nahīñ hai

mat dekh ki phirta hun tere hijr mein zinda

ye puchh ki jine mein maza hai ki nahin hai

chaar jānib dekh kar sach boliye

aadmī phirte haiñ sarkārī bahut

chaar jaanib dekh kar sach boliye

aadmi phirte hain sarkari bahut

thoḌā sā aks chāñd ke paikar meñ Daal de

tū aa ke jaan raat ke manzar meñ Daal de

thoDa sa aks chand ke paikar mein Dal de

tu aa ke jaan raat ke manzar mein Dal de

un se mil kar aur bhī kuchh baḌh ga.iiñ

uljhaneñ fikreñ qayās-ārā.iyāñ

un se mil kar aur bhi kuchh baDh gain

uljhanen fikren qayas-araiyan