Urdu Ke 25 Zarbul Masal Sher

maiñ akelā hī chalā thā jānib-e-manzil magar

log saath aate ga.e aur kārvāñ bantā gayā

main akela hi chala tha jaanib-e-manzil magar

log sath aate gae aur karwan banta gaya

un ke dekhe se jo aa jaatī hai muñh par raunaq

vo samajhte haiñ ki bīmār kā haal achchhā hai

un ke dekhe se jo aa jati hai munh par raunaq

wo samajhte hain ki bimar ka haal achchha hai

ye ishq nahīñ āsāñ itnā hī samajh liije

ik aag kā dariyā hai aur Duub ke jaanā hai

ye ishq nahin aasan itna hi samajh lije

ek aag ka dariya hai aur Dub ke jaana hai

sair kar duniyā kī ġhāfil zindagānī phir kahāñ

zindagī gar kuchh rahī to ye javānī phir kahāñ

sair kar duniya ki ghafil zindagani phir kahan

zindagi gar kuchh rahi to ye jawani phir kahan

be-ḳhudī be-sabab nahīñ 'ġhālib'

kuchh to hai jis kī parda-dārī hai

be-KHudi be-sabab nahin 'ghaalib'

kuchh to hai jis ki parda-dari hai

zindagī zinda-dilī kā hai naam

murda-dil ḳhaak jiyā karte haiñ

zindagi zinda-dili ka hai nam

murda-dil KHak jiya karte hain

dil ke phaphūle jal uThe siine ke daaġh se

is ghar ko aag lag ga.ī ghar ke charāġh se

dil ke phaphule jal uThe sine ke dagh se

is ghar ko aag lag gai ghar ke charagh se

rāh-e-dūr-e-ishq meñ rotā hai kyā

aage aage dekhiye hotā hai kyā

rah-e-dur-e-ishq mein rota hai kya

aage aage dekhiye hota hai kya

'umr saarī to kaTī 'ishq-e-butāñ meñ 'momin'

āḳhirī vaqt meñ kyā ḳhaak musalmāñ hoñge

'umr sari to kaTi 'ishq-e-butan mein 'momin'

aaKHiri waqt mein kya KHak musalman honge

bas-ki dushvār hai har kaam kā āsāñ honā

aadmī ko bhī muyassar nahīñ insāñ honā

bas-ki dushwar hai har kaam ka aasan hona

aadmi ko bhi muyassar nahin insan hona

sadā aish daurāñ dikhātā nahīñ

gayā vaqt phir haath aatā nahīñ

sada aish dauran dikhata nahin

gaya waqt phir hath aata nahin

chal saath ki hasrat dil-e-marhūm se nikle

āshiq kā janāza hai zarā dhuum se nikle

chal sath ki hasrat dil-e-marhum se nikle

aashiq ka janaza hai zara dhum se nikle

qais jañgal meñ akelā hai mujhe jaane do

ḳhuub guzregī jo mil baiTheñge dīvāne do

qais jangal mein akela hai mujhe jaane do

KHub guzregi jo mil baiThenge diwane do

bhāñp hī leñge ishāra sar-e-mahfil jo kiyā

tāḌne vaale qayāmat kī nazar rakhte haiñ

bhanp hi lenge ishaara sar-e-mahfil jo kiya

taDne wale qayamat ki nazar rakhte hain

ai sanam vasl kī tadbīroñ se kyā hotā hai

vahī hotā hai jo manzūr-e-ḳhudā hotā hai

ai sanam wasl ki tadbiron se kya hota hai

wahi hota hai jo manzur-e-KHuda hota hai

āḳhir gil apnī sarf-e-dar-e-mai-kada huī

pahuñche vahāñ hī ḳhaak jahāñ kā ḳhamīr ho

aaKHir gil apni sarf-e-dar-e-mai-kada hui

pahunche wahan hi KHak jahan ka KHamir ho

na jaanā ki duniyā se jaatā hai koī

bahut der kī mehrbāñ aate aate

na jaana ki duniya se jata hai koi

bahut der ki mehrban aate aate

na gor-e-sikandar na hai qabr-e-dārā

miTe nāmiyoñ ke nishāñ kaise kaise

na gor-e-sikandar na hai qabr-e-dara

miTe namiyon ke nishan kaise kaise

'mīr' amdan bhī koī martā hai

jaan hai to jahān hai pyāre

'mir' amdan bhi koi marta hai

jaan hai to jahan hai pyare

agar baḳhshe zahe qismat na baḳhshe to shikāyat kyā

sar-e-taslīm ḳham hai jo mizāj-e-yār meñ aa.e

agar baKHshe zahe qismat na baKHshe to shikayat kya

sar-e-taslim KHam hai jo mizaj-e-yar mein aae

fikr-e-ma.āsh ishq-e-butāñ yād-e-raftagāñ

is zindagī meñ ab koī kyā kyā kiyā kare

fikr-e-maash ishq-e-butan yaad-e-raftagan

is zindagi mein ab koi kya kya kiya kare

ġhazālāñ tum to vāqif ho kaho majnūñ ke marne kī

divāna mar gayā āḳhir ko vīrāne pe kyā guzrī

ghazalan tum to waqif ho kaho majnun ke marne ki

diwana mar gaya aaKHir ko virane pe kya guzri

laa.ī hayāt aa.e qazā le chalī chale

apnī ḳhushī na aa.e na apnī ḳhushī chale

lai hayat aae qaza le chali chale

apni KHushi na aae na apni KHushi chale

muflisī sab bahār khotī hai

mard kā e'tibār khotī hai

muflisi sab bahaar khoti hai

mard ka e'tibar khoti hai

charḳh ko kab ye salīqa hai sitamgārī meñ

koī ma.ashūq hai is parda-e-zañgārī meñ

charKH ko kab ye saliqa hai sitamgari mein

koi mashuq hai is parda-e-zangari mein