تھی سیاہیوں کا مسکن مری زندگی کی وادی

ترے حسن کے تصدق مجھے روشنی دکھا دی

باقی ہی کیا رہا ہے تجھے مانگنے کے بعد

بس اک دعا میں چھوٹ گئے ہر دعا سے ہم

کتنی پامال امنگوں کا ہے مدفن مت پوچھ

وہ تبسم جو حقیقت میں فغاں ہوتا ہے

اس کے وعدوں سے اتنا تو ثابت ہوا اس کو تھوڑا سا پاس تعلق تو ہے

یہ الگ بات ہے وہ ہے وعدہ شکن یہ بھی کچھ کم نہیں اس نے وعدے کیے

سبق ملا ہے یہ اپنوں کا تجربہ کر کے

وہ لوگ پھر بھی غنیمت ہیں جو پرائے ہیں

عشق کے مراحل میں وہ بھی وقت آتا ہے

آفتیں برستی ہیں دل سکون پاتا ہے

آبلوں کا شکوہ کیا ٹھوکروں کا غم کیسا

آدمی محبت میں سب کو بھول جاتا ہے

ظاہراً توڑ لیا ہم نے بتوں سے رشتہ

پھر بھی سینے میں صنم خانہ بسا ہے یارو

چند الفاظ کے موتی ہیں مرے دامن میں

ہے مگر تیری محبت کا تقاضا کچھ اور

مری زندگی کا حاصل ترے غم کی پاسداری

ترے غم کی آبرو ہے مجھے ہر خوشی سے پیاری

عقل تھک کر لوٹ آئی جادۂ آلام سے

اب جنوں آغاز فرمائے گا اس انجام سے

ہمیں آخرت میں عامرؔ وہی عمر کام آئی

جسے کہہ رہی تھی دنیا غم عشق میں گنوا دی

عشق سر تا بہ قدم آتش سوزاں ہے مگر

اس میں شعلہ نہ شرارہ نہ دھواں ہوتا ہے

یہ قدم قدم بلائیں یہ سواد کوئے جاناں

وہ یہیں سے لوٹ جائے جسے زندگی ہو پیاری