کوثر مظہری کی شاعری

جانے کس خواب پریشاں کا ہے چکر سارا

بکھرا بکھرا ہوا رہتا ہے مرا گھر سارا

نظر جھک رہی ہے خموشی ہے لب پر

حیا ہے ادا ہے کہ ان بن ہے کیا ہے

ربط ہے اس کو زمانے سے بہت سنتا ہوں

کوئی ترکیب کروں میں بھی زمانہ ہو جاؤں

بوجھ دل پر ہے ندامت کا تو ایسا کر لو

میرے سینے سے کسی اور بہانے لگ جاؤ

کون سی دنیا میں ہوں کس کی نگہبانی میں ہوں

زندگی ہے سخت مشکل پھر بھی آسانی میں ہوں

تعاقب میں ہے میرے یاد کس کی

میں کس کو بھول جانا چاہتا ہوں

ایک مدت سے خموشی کا ہے پہرہ ہر سو

جانے کس اور گئے شور مچانے والے

میں سب کے واسطے اچھا تھا لیکن

اسی کے واسطے اچھا نہیں تھا

چاند ہے پانی میں یا بھولے ہوئے چہرے کا عکس

ساحل دریا پہ دیکھو میں بھی حیرانی میں ہوں

اس کی پلکوں پہ جو چمکا تھا ستارہ کوئی

دیکھتے دیکھتے مہتاب ہوا جاتا ہے

پتلیوں پر رقص کرنا ہی کمال فن نہیں

درد کے آنسو کو تو پیہم روانی چاہئے

موسم دل جو کبھی زرد سا ہونے لگ جائے

اپنا دل خون کرو پھول اگانے لگ جاؤ

گرا تھا بوجھ کوئی سر سے میرے

اسی کو پھر اٹھانا چاہتا ہوں

وہی قطرہ جو کبھی کنج سر چشم میں تھا

اب جو پھیلا ہے تو سیلاب ہوا جاتا ہے

کوثر مظہری