دم رخصت وہ چپ رہے عابدؔ

آنکھ میں پھیلتا گیا کاجل

اک دن اس نے نین ملا کے شرما کے مکھ موڑا تھا

تب سے سندر سندر سپنے من کو گھیرے پھرتے ہیں

تیرے خوش پوش فقیروں سے وہ ملتے تو سہی

جو یہ کہتے ہیں وفا پیرہن چاک میں ہے

یا کبھی عاشقی کا کھیل نہ کھیل

یا اگر مات ہو تو ہاتھ نہ مل

کہتے تھے تجھی کو جان اپنی

اور تیرے بغیر بھی جئے ہیں

انہیں کو عرض وفا کا تھا اشتیاق بہت

انہیں کو عرض وفا نا گوار گزری ہے

میرا جینا ہے سیج کانٹوں کی

ان کے مرنے کا نام تاج محل

وہ مجھے مشورۂ ترک وفا دیتے تھے

یہ محبت کی ادا ہے مجھے معلوم نہ تھا

واعظو میں بھی تمہاری ہی طرح مسجد میں

بیچ دوں دولت ایماں تو مزا آ جائے

جلوۂ یار سے کیا شکوۂ بے جا کیجے

شوق دیدار کا عالم وہ کہاں ہے کہ جو تھا

ساقیا ہے تری محفل میں خداؤں کا ہجوم

محفل افروز ہو انساں تو مزا آ جائے

کچھ احترام بھی کر غم کی وضع داری کا

گراں ہے عرض تمنا تو بار بار نہ کر

آج آیا ہے اپنا دھیان ہمیں

آج دل کے نگر سے گزرے ہیں

میرے جینے کا یہ اسلوب پتہ دیتا ہے

کہ ابھی عشق میں کچھ کام ہیں کرنے والے

کوئی برسا نہ سر کشت وفا

کتنے بادل گہر افشاں گزرے

یہ حادثہ بھی ہوا ہے کہ عشق یار کی یاد

دیار قلب سے بیگانہ وار گزری ہے

در اخلاص کی دہلیز پر خم ہوں عابدؔ

ایک جینے کا سلیقہ دل بیباک میں ہے

مجھے دھوکا ہوا کہ جادو ہے

پاؤں بجتے ہیں تیرے بن چھاگل

اے التفات یار مجھے سوچنے تو دے

مرنے کا ہے مقام یا جینے کا محل

غم کے تاریک افق پر عابدؔ

کچھ ستارے سر مژگاں گزرے

شب ہجراں کی درازی سے پریشان نہ تھا

یہ تیری زلف رسا ہے مجھے معلوم نہ تھا

کبھی میں جرأت اظہار مدعا تو کروں

کوئی جواز تو ہو لطف بے سبب کے لئے

یہ کیا طلسم ہے دنیا پہ بار گزری ہے

وہ زندگی جو سر رہ گزار گزری ہے

شرع و آئین کی تعزیر کے با وصف شباب

لب و رخسار کی جانب نگراں ہے کہ جو تھا

عشق کی طرز تکلم وہی چپ ہے کہ جو تھی

لب خوش گوئے ہوس محو بیاں ہے کہ جو تھا

سبو اٹھا کہ یہ نازک مقام ہے ساقی

نہ اہرمن ہے نہ یزداں ہے دیکھیے کیا ہو

یہی دل جس کو شکایت ہے گراں جانی کی

یہی دل کار گہ شیشہ گراں ہوتا ہے

غم دوراں غم جاناں کا نشاں ہے کہ جو تھا

وصف خوباں بہ حدیث دگراں ہے کہ جو تھا