آئینہ چپکے سے منظر وہ چرا لیتا ہے

تو سجاتا ہے بدن جب کبھی عریانی سے

ہم اپنے شہر سے ہو کر اداس آئے تھے

تمہارے شہر سے ہو کر اداس جانا تھا

بے صدا سی کسی آواز کے پیچھے پیچھے

چلتے چلتے میں بہت دور نکل جاتا ہوں

وہ کوئی عام سا ہی جملہ تھا

تیرے منہ سے برا لگا مجھ کو

باپ زینہ ہے جو لے جاتا ہے اونچائی تک

ماں دعا ہے جو سدا سایہ فگن رہتی ہے

اس گئے سال بڑے ظلم ہوئے ہیں مجھ پر

اے نئے سال مسیحا کی طرح مل مجھ سے

تمہارے سچ کی حفاظت میں یوں ہوا اکثر

کہ اپنے آپ کو جھوٹا بنا لیا میں نے

بدن سرائے میں ٹھہرا ہوا مسافر ہوں

چکا رہا ہوں کرایہ میں چند سانسوں کا

کتنا دشوار ہے اک لمحہ بھی اپنا ہونا

اس کو ضد ہے کہ میں ہر حال میں اس کا ہو جاؤں

مرے بغیر کوئی تم کو ڈھونڈتا کیسے

تمہیں پتہ ہے تمہارا پتہ رہا ہوں میں

سفر کہاں سے کہاں تک پہنچ گیا میرا

رکے جو پاؤں تو کاندھوں پہ جا رہا ہوں میں

خدا کرے کہ وہی بات اس کے دل میں ہو

جو بات کہنے کی ہمت جٹا رہا ہوں میں

عشق ادب ہے تو اپنے آپ آئے

گر سبق ہے تو پھر پڑھا مجھ کو