kab kaha humne ise bar-e-garan jaante hain

kab kahā ham ne ise bār-e-garāñ jānte haiñ

ham to ġham ko tire sarmāya-e-jāñ jānte haiñ

abr zulfoñ ko to aariz ko samajhte haiñ gulāb

tiir nazroñ ko to abrū ko kamāñ jānte haiñ

haiñ vahī asl meñ mīrās-e-adab ke vāris

'mīr'-o-'ġhālib' kā jo andāz-e-bayāñ jānte haiñ

vo hai mere liye āġhāz-e-safar kī sūrat

jis ko arbāb-e-ḳhirad apnā makāñ jānte haiñ

tishna-lab rah ga.e sāhil pe na jaane kitne

kis ke kaam aaya hai ye āb-e-ravāñ jānte haiñ

azmat-e-arz-e-vatan kyā hai ye ham se pūchho

is ke zarroñ ko bhī ham kāhkashāñ jānte haiñ

roz Dhaltā hai yahāñ jaam meñ insāñ kā lahū

roz haq-goī pe kaTtī hai zabāñ jānte haiñ

tangī-e-zīst pe ghabrā ke jo mar jaate haiñ

rahmat-e-rabb-e-do-ālam vo kahāñ jānte haiñ

ham se pūchhe koī neze kī anī hai kyā chiiz

sang kyā hotā hai ā.īna-garāñ jānte haiñ

ḳhāmī-e-fikr hai yā zo'm-e-basīrat hai nadīm

narm gītoñ ko bhī kuchh log fuġhāñ jānte haiñ

kab kaha hum ne ise bar-e-garan jaante hain

hum to gham ko tere sarmaya-e-jaan jaante hain

abr zulfon ko to aariz ko samajhte hain gulab

tir nazron ko to abru ko kaman jaante hain

hain wahi asl mein miras-e-adab ke waris

'mir'-o-'ghaalib' ka jo andaz-e-bayan jaante hain

wo hai mere liye aaghaz-e-safar ki surat

jis ko arbab-e-KHirad apna makan jaante hain

tishna-lab rah gae sahil pe na jaane kitne

kis ke kaam aaya hai ye aab-e-rawan jaante hain

azmat-e-arz-e-watan kya hai ye hum se puchho

is ke zarron ko bhi hum kahkashan jaante hain

roz Dhalta hai yahan jam mein insan ka lahu

roz haq-goi pe kaTti hai zaban jaante hain

tangi-e-zist pe ghabra ke jo mar jate hain

rahmat-e-rabb-e-do-alam wo kahan jaante hain

hum se puchhe koi neze ki ani hai kya chiz

sang kya hota hai aaina-garan jaante hain

KHami-e-fikr hai ya zo'm-e-basirat hai nadim

narm giton ko bhi kuchh log fughan jaante hain