tishnagī aa tujhe dariyā ke havāle kar duuñ

tujh ko is haal meñ pyāsā nahīñ dekhā jaatā

tishnagi aa tujhe dariya ke hawale kar dun

tujh ko is haal mein pyasa nahin dekha jata

tumhāre baad ye ġham bhī uThānā paḌtā hai

ḳhushī mile na mile muskurānā paḌtā hai

tumhaare baad ye gham bhi uThana paDta hai

KHushi mile na mile muskurana paDta hai

tum mirā nām-o-nasab pūchh rahe ho sab se

ishq ho jaa.e to shajara nahīñ dekhā jaatā

tum mera nam-o-nasab puchh rahe ho sab se

ishq ho jae to shajara nahin dekha jata

umr-bhar un se ta'alluq nahīñ TuuTā kartā

aise kuchh log haiñ jo dil meñ utar jaate haiñ

umr-bhar un se ta'alluq nahin TuTa karta

aise kuchh log hain jo dil mein utar jate hain

unheñ yaqīñ ki koī ranj-o-ġham nahīñ mujh ko

mujhe bharam ki mirā mas.ala samajhte haiñ

unhen yaqin ki koi ranj-o-gham nahin mujh ko

mujhe bharam ki mera masala samajhte hain

bas ik yahī to ḳharābī hai us kī fitrat meñ

vo mujh ko yaad to kartā hai par zarūrat meñ

bas ek yahi to KHarabi hai us ki fitrat mein

wo mujh ko yaad to karta hai par zarurat mein

sab ko dil kā raaz batānā Thiik nahīñ

duniyā-dārī duniyā-dārī hotī hai

sab ko dil ka raaz batana Thik nahin

duniya-dari duniya-dari hoti hai

tum apnī tabāhī kā mātam to kar lo

mire haal par muskurāne se pahle

tum apni tabahi ka matam to kar lo

mere haal par muskurane se pahle

tumhāre ġham kī udāsī qalīl karte hue

maiñ jī rahā huuñ mohabbat tavīl karte hue

tumhaare gham ki udasi qalil karte hue

main ji raha hun mohabbat tawil karte hue

pata kaise hoñ āḳhir hijr ke asbāb duniyā ko

tire hoñToñ pe ḳhāmoshī mire hālāt poshīda

pata kaise hon aaKHir hijr ke asbab duniya ko

tere honTon pe KHamoshi mere haalat poshida