کسے دوست اپنا بنائیں ہم کسے دل کا حال سنائیں ہم

سبھی غیر ہیں سبھی اجنبی ترے گاؤں میں مرے شہر میں

اس سے پوچھو عذاب رستوں کا

جس کا ساتھی سفر میں بچھڑا ہے

تمہارا نام لیا تھا کبھی محبت سے

مٹھاس اس کی ابھی تک مری زبان میں ہے

تعجب کچھ نہیں داناؔ جو بازار سیاست میں

قلم بک جائیں تو سچ بات لکھنا چھوڑ دیتے ہیں

اپنے ہی خون سے اس طرح عداوت مت کر

زندہ رہنا ہے تو سانسوں سے بغاوت مت کر

جو ہیں مظلوم ان کو تو تڑپتا چھوڑ دیتے ہیں

یہ کیسا شہر ہے ظالم کو زندہ چھوڑ دیتے ہیں

تم آکے لوٹ گئے پھر بھی ہو یہیں موجود

تمہارے جسم کی خوشبو مرے مکان میں ہے

گھر کی ویرانیاں لے جائے چرا کر کوئی

اسی امید پہ دروازہ کھلا رکھا ہے

ہے جسم سخت مگر دل بہت ہی نازک ہے

کہ جیسے آئینہ محفوظ اک چٹان میں ہے

اس سے بڑھ کر تری یادوں کی کروں کیا تعظیم

تیری یادوں میں زمانے کو بھلا رکھا ہے